蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月02日

【《G-1格鬥會II》】初賽落敗冇陰影 腳傷麥紫莉認真學MMA

11,246
建立時間 (HKT): 1202 00:10

ViuTV節目《G-1格鬥會II》晚上喺灣仔修頓舉行決賽,由余智嘉對戰何慈恩,一班選手包括麥家琪、麥紫莉等都專程到場支持。比賽分5回合、每回合2分鐘進行,首回合何慈恩率先進擊余智嘉,成功打到對方流鼻血。其後幾個回合余智嘉不斷嘗試使出鎖技,可惜只能成功鎖到對方一次,大部分攻擊都被體形較纖巧靈活嘅何慈恩避開,最後拳證判何慈恩勝出賽事。

獲勝嘅何慈茵賽後接受訪問時,表示滿意自己表現:「今次策略成功終於鬆一口氣,因為呢幾個月以嚟嘅訓練好大壓力,要多謝爸爸喺背後好Support我。」何慈恩表示今次傷勢唔算嚴重,主要都係瘀傷,佢又透露經過今次比賽後,對打MMA產生濃厚興趣,佢話:「如果今次對手重我20公斤我都有咁嘅成績,我有信心第時打業餘賽可以對住同我體形相近嘅對手。」

而早前喺日本初賽落敗嘅麥家琪表示,雖事隔兩個多月,但現時仍係休息中:「打過先知呢項運動唔簡單,以前帶完小朋友返學後會做運動,一星期會打三次泰拳,但最近都只係慢跑冇打拳,因為心態上Pick up番,不過打算聖誕期間會打番。」講到當時初賽落敗後怕老公會笑佢,問到結果如何?佢話:「老公話我抵死,睇我唔會打贏。呢項運動太專業,見到其他拳手身形好敏捷,下次再有機會都唔好啦,留番俾專業人士。」

另外,同樣初賽落敗兼整傷腳嘅麥紫莉,就話腳傷仍未完全康復:「仲睇緊醫生做物理治療,自己覺得呢個運動好有趣,好番之後都會嘗試認真學習MMA,再有機會打都會參加。」怕唔怕再受傷?佢話:「所以咪要練習得再好啲囉,我唔怕受傷,呢個係必經階段。」又話趁住休養期間走去學化妝同美容增值自己。咁腳傷後有冇多咗男士向你獻殷勤?佢話:「冇特別係男士,所有男女性朋友都好照顧我。」

更多娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載