蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月06日

【首談張繼聰被無綫封殺】一早知情 謝安琪承認:朋友好擔心我哋生計

396,548
建立時間 (HKT): 1206 21:05

張繼聰因為經理人公司同無綫嘅官司而遭大台封殺,呢一點張繼聰都有拍片承認,講明大家都會有一排喺大台見唔到佢。

張繼聰夫人謝安琪今日產後首復工,晚上到金鐘出席活動,講完瘦身當然要回應一下老公被雪一事,Kay亦未有否認:「嗰個消息,其實喺傳出之前都有聽過嘅。到大家知道之後,我哋都收到好多慰問,好多平時唔係成日見到面、一啲前輩,同輩朋友都好,好多人慰問我哋,亦有啲朋友好搞笑嘅,好擔心我哋生計,好踴躍咁,『我哋有朋友做廣告0架!』介紹好多工作俾佢。好戥佢開心囉,真係好多人都好錫佢,所以大家真係唔使擔心佢,工作安排已經一早安排好喇,其他嗰啲佢自己都答咗啦。」

「其實Juno(麥浚龍)真係三顧草蘆。我休息期間,佢都入咗嚟四五次,有次佢自己入嚟,有時同同事入嚟。佢好體貼,簽到o依家都成日搵我傾偈,知我對家庭嘅重要性,佢哋畀咗好大信心我,對我工作亦好了解,好到我同我老公都覺得,『唔簽佢好衰好唔得喎!』連老公都抗拒唔到佢份溫柔。」

問到有傳Kay以八位數字過檔,她聞言即大耍太極:「嗰啲數字嘅嘢好複雜,生女時又話要上契,上契費點計呢?係咪搵我個女計?到時喺合約度扣番?呢啲數有排計。」

咁有冇八位數先?Kay再話:「好難計呀!」

Kay之前喺網上呻到樹葉都落,話個女只係識得嗌爸爸唔識嗌媽媽,問到依家有冇新進展?Kay繼續詐型話:「哎吔!其實我已經用咗好多方法,不停提示個女,佢都冇叫媽咪,我好嬲呀!因為我係全職湊佢㗎嘛,佢明明見住我都叫我爸爸,可能爸爸係佢前世情人,魅力沒法撞,冇辦法。」

更多娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載