› 選擇地區
三藩市
紐約
洛杉磯
其他美國地區
香港 台灣 北美
 
2017年12月13日

【靚女畫家歌手】 Aka開畫展為女性籌款 定價過萬一幅

建立時間 (HKT): 1213 07:00

本身係歌手嘅Super Girls成員趙慧珊(Aka),仲係一個業餘畫家,喺繪畫針筆畫有豐富經驗嘅Aka,喺今個月舉行首次個人慈善畫展《HER》,為香港婦女中心協會嘅「婦女緊急援助基金」籌款。

外表文靜,喺喺筆下會出現腦漿、暴力同爆頭等畫面嘅Aka,今次收起暴力,繪畫廿多幅以女性為主題嘅針筆畫,Aka表示,希望通今次籌款畫展,幫助弱勢受欺壓同失婚嘅女性,Aka話:「失婚婦女面對壓力好大,可能受到暴打或經濟壓力,照顧小朋友及雙親,社會都給予好多壓力,令佢哋唔敢去行出去,婦女協會可以俾佢哋申請個基金,使佢哋容易啲行出個框框。」

今次Aka嘅針筆畫,係以黑白同金色為主調,佢解釋話:「金色係我對女性專重及推崇,好想俾佢哋知道,佢哋係好值得珍惜同好珍貴,希望佢哋睇完有個希望。」Aka今次繪出20幅針筆畫,5幅雕刻板畫,Aka表示仲努力緊趕工,佢話:「自己未達到呢個數目,覺得唔ok就掉,我要最有意思,構圖最靚,每朝都要畫到5、6點。構圖偏向黑暗,係希望關注婦女遇到嘅問題,當然問題係負面,帶出愛及其本身價值。」Aka透露,不眠不休趕工,每幅都要3、4日時間先完成,佢話:「今次畫展對我來講工作量幾大,但自己好享受。平時鍾意畫嗰啲仲負面沉重,爆頭、骷髏頭、啲肉同啲骨拉扯,今次未必攞得出嚟,怕嚇死人。」Aka指畫中嘅黑白色能代表一切,佢話:「顏色當然係靚,但屬花巧,如果要睇真一樣嘢,黑白色就可以睇到,黑白色可以畫得好細緻,針筆可以畫到好細緻,可以睇到裏面層次同線條,我繪畫每一條線都係諗緊嘢。」

可以開畫展,但就無師自通,Aka說:「無師自通,我都覺得有少少係,我會上網睇好多畫家作品,睇睇佢哋哋畫風同埋分佈,畫太多線條會亂。因為呢個畫展,我專程去到德國一啲博物館,睇好多唔同嘅畫,又到上海嘅藝術館,仲有台灣等地,好多唔同嘅地方我特登去睇。」對於未曾學過繪畫,Aka解釋過往讀嘅中學,要考獲前20名先能夠加入藝術班,但自己未能獲選,當時都感到失望。

首次舉行畫展,心情當然緊張,Aka話:「我估唔到自己能夠開畫,今次大家都將焦點放喺自己度,我緊張因為自己唔係學院派出身,真係好叻畫畫嘅人,會用佢哋好專業嘅知識去鑑定啲畫,好想俾佢哋見到,我未必係好專業,但係我好用心去畫,畫出嚟最希望可以為香港婦女協會籌到好多慈款。」

今次除了拍賣畫作籌款,大會更以Aka嘅畫作圖案,推出不同產品,包括文具、環保袋及文件篋等,Aka話:「可能我嘅畫定價較高,我啲fans好細個,未必有錢去買,但佢哋可以買其他產品做慈善。」Aka嘅畫作定價過萬一幅,佢話:「價錢唔係我定,大會有專業定價,自己開頭估幾千蚊都貴,原來業餘畫家都要賣2、3萬蚊一幅。」對於日後會唔會向繪畫藝術方面發展,Aka話:「我想暫時繪畫做慈善先,如果出產品,我想保持自己親手畫落去,唔想大量印製生產,可能一個月出一套我嘅餐具,用陶瓷燒出嚟,再用作慈善。」畫展將於2017年12月21日至2018年1月8日假上環ZZHK Gallery 舉行。


採訪:張俊銘、攝影:沈健程、拍片:馮嘉銘


更多娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載