蘋果日報 | APPLE DAILY
› 選擇地區
三藩市
紐約
洛杉磯
其他美國地區
2017年12月26日

【洋蔥信】荷蘭患病歌迷GiGi睇騷 千嬅:媽媽為你付出好多心機

51,933
建立時間 (HKT): 1226 14:25

楊千嬅早前開「拉闊音樂會」,喺台上讀一封患病女歌迷GiGi媽咪親手寫嘅信,講囡囡GiGi今年做開腦手術失敗咗,昏迷一段時間之後終於醒番,做緊復健療程,學習寫字時,第一個勉強寫出……就係「楊千嬅」三個字,千嬅當時一路讀信一路喊(新聞連結: http://bit.ly/2m2DDyi ),fans知道呢件事之後,紛紛希望荷蘭患病女歌迷GiGi可以見到千嬅!

噚日聖誕節,GiGi終於可以見到佢嘅偶像,GiGi由媽咪陪同,由荷蘭嚟到香港睇《三二一GO!演唱會》,睇完騷後,二人於後台見面,GiGi表現興奮,千嬅鼓勵佢:「你一定要勇敢面對!媽媽、我同埋你好多朋友親人都會陪住你、支持你。(你嚟荷蘭玩呀?)好呀,我都未去過荷蘭。」千嬅鼓勵GiGi要多啲練習寫字,仲要多啲寫媽媽個名:「媽媽為你付出好多心機,你一定要加油,努力,好多人好錫你。」

千嬅一直係GiGi嘅精神支柱,佢都好想同偶像合照,GiGi喺媽咪同親友協助下,出盡努力企起身,雖然只係企咗起身幾十秒,不過千嬅同現場嘅人,見到呢一刻都好感動,為GiGi打氣,千嬅更叮囑GiGi要保重同多啲休息,GiGi反而叮囑千嬅:「你返去要瞓覺,唔好再玩live!」因為前晚完騷後千嬅一返屋企就上網做直播,聽完GiGi教訓,千嬅都話會乖乖聽話,為今年聖誕節留下美好回憶。

此外,千嬅噚晚喺紅館演唱會第3場,換咗3套新look,適逢係聖誕節,encore嗰陣,千嬅俾歌迷點唱,有人點唱聖誕歌,千嬅笑言:「我只係識唱《Last Christmas》會唔會好掃興?冇綵排過又冇歌詞喺手……」之後全場大合唱,充滿節日氣氛,跟住又有人點唱《再見二丁目》同《抬起我的頭來》,有歌迷就點唱《塔羅迷》,點知千嬅聽錯係「塔羅牌」,佢搞笑咁講:「塔羅牌?你應該上網搵師傅,如果我識埋塔羅牌不得了,我咁聰明一算就算到今晚11點收工!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載