蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年01月07日

【坐正第一行】紅館開個唱男友Tarzan撐場 JW主動開聲:握手啦

22,931
建立時間 (HKT): 0107 09:56

JW王灝兒首個紅館演唱會《Never Too Early 2018》噚晚開鑼,三面台加中間一個向前伸延嘅舞台設計,獲得全場爆滿。著住米黃色長裙嘅JW首先喺個凌空吊起嘅方形盒子裡登場,一口氣唱出《太空人》及《自由飛翔》後,就同觀眾打招呼:「大家好,我係JW,真係好開心今日企喺呢個舞台,因為係我一次,所以我呢世都會記得今晚,記得你哋全部人。」

第二部份環節,JW換上金色網面裙,跟Dancers們載歌載舞,然後就到嘉賓關楚耀(Kevin)出場,西裝骨骨現身嘅關楚耀跟換上粉色入膊長裙嘅JW合唱出《不該》後,JW就同Dancers們上演一幕「水中舞」,濕住身嘅JW更脫鞋赤腳企上鋼琴上連續唱出《我們都寂寞》、《妒忌心》及《孤單不要怕》,跟住就到另一嘉賓吳業坤現身合唱《原來只因深愛著》。其後由Kevin同坤哥合唱《男人信什麼》,換上綠色格仔裙嘅JW向兩人表示:「男人信什麼好啱你兩個講,因為都係信唔過。」

送走兩位嘉賓後,JW喺工作人員幫忙下跳落台下觀眾握手,其男友Tarzan就坐正第一行,JW主動向佢講:「握手啦!」Tarzan就乖乖地伸出手同女友握手,然後JW再指住觀眾席上,嚟捧場嘅好友何超蓮大叫:「我見到超蓮嚟咗。」握手環節後就跳返上台,向觀眾講:「今日好開心,首先我要好多謝Leon(黎明),無佢我唔會入行,然後要多謝依家嘅老闆,將我帶到嚟紅館。」講完就同Dancers們表演快歌環節。

唱到《小故事》時,JW已經忍唔住邊唱邊喊,到歌曲尾段更唱唔到落去,佢哽咽地表示:「今晚係第一場,亦係最後一場,我已經將所有俾晒你哋,多謝大家俾錢嚟聽我唱歌。」然後再唱出《矛盾一生》。

Encore環節邀得鄭中基(Ronald)任第三位嘉賓,同JW手拖手出場並合唱《我代你哭》,JW表示上一次九展演唱會已經想請Ronald但未成事,終於可以喺今次成功。Ronald就首先恭喜對方,然後就問JW有關上次勁歌金曲頒獎禮上疑似爆粗事件:「聽講你講粗口喎?」JW話:「我無呀。」Ronald話:「無呀,我本來仲諗住讚你o添。」JW再笑言:「嗰次無囉。」Ronald再抵死咁話:「真係?我依家入去再聽多次先。」

演出後JW接受訪問時表示:「好開心,今日有好多朋友嚟睇,何超蓮、林奕匡、AGA、許廷鏗、胡鴻鈞仲有鄭欣宜。」有無邀請前老闆黎明?佢話:「有邀請呀,不過佢好忙無時間嚟,但以前A Music嘅舊同事全部都有嚟支持我。」

今次演唱會只得一場嘅JW直言唔夠喉:「花咗好多時間準備,但時間過得好快,好似30分鐘就唱完咁。」淨係舉行一場公司會唔會蝕錢?佢話:「呢個係令我最開心嘅地方,全公司上下都淨係想做好呢個騷,無諗過有冇錢賺,即使可能蝕錢大家都唔介意 。」尤其是台上灑水嗰一Part,佢話係參考Adele嘅演唱會:「台上濕咗身真係好凍,不過見到台下觀眾咁樣歡呼,就咩都抵返晒。」

講到台下坐喺第一行嘅男友Tarzan點解唔公開多謝佢??JW話:「呢啲我哋在心中。」佢仲透露自己跳舞環節,秘密苦練咗幾個月,男友都係第一次睇。


更多娛聞,喺晒《娛果》
http://fb.com/appledailyent

【minigame】2017瘋暈人物 返工打機唔使擇日
http://bit.ly/2CeWQkP

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載