› 選擇地區
三藩市
紐約
洛杉磯
其他美國地區
香港 台灣 北美
 
2018年01月21日

【留港過年】方便滑雪剪skin head 梁朝偉:好心急去北海道滑雪

建立時間 (HKT): 0121 18:42

梁朝偉今日喺灣仔為主演電影《捉妖記2》宣傳,現場唔少得戲中精靈笨笨同胡巴,曾經同梁朝偉一齊主持兒童節目嘅譚玉瑛姐姐就做司儀,譚玉瑛姐姐仲爭取時間同偉仔selfie。台下趙哲妤、郭思琳、莊思敏就一睹男神風采,隔空合照。偉仔在戲中演一位電眼賭徒,譚玉瑛叫偉仔教人發新年財,偉仔話:「過年自己都好似人哋家家戶戶咁玩吓麻雀同撲克,我年年都贏,我嘅理論係唔好玩太耐,輸贏都好幾分鐘就走,呢個係我秘訣。」

相關新聞:【秘婚?催婚?】譚玉瑛姐姐滿意現時生活:總之多謝大家關心

偉仔話好耐冇公開出席戶外宣傳活動,印像中對上一次係《無間道》宣傳先咁大型,今次好開心,希望多啲喺香港見大家,但平時又唔會無啦啦走出嚟。見偉仔剪咗一頭skin head,佢話:「因為容易打理,去滑雪、滑水都方便 ,有時滑雪食晏除低頂帽,個頭就扁哂,人哋叫影相, 我又唔好意思唔影,所以今年去滑雪前決定剃咗佢,乾淨俐落。」偉仔早前隻身去北海道滑雪,佢話:「嘉玲要下一次先可以去,今年我哋會喺香港過年,自己每年都去咗滑雪,媽咪又去唔到雪地,加上今年嘉玲要拍劇到二月,自己都好心急想再返去北海道滑雪,只係玩咗少少未玩夠。」偉仔同嘉玲情人節都會在港,不過冇特別準備禮物。

嘉玲同新人吳肇軒合作新戲《以青春的名義》,偉仔話未有時間捧場, 自己都想去睇下嘉玲監製做成點 ,嘉玲曾經話過覺得男主角吳肇軒似偉仔,偉仔笑稱似我冇用啦。今次《捉妖記2 》正正同嘉玲演《我的情敵女婿》賀歲片打對台,偉仔話應該係第一次,會互相捧場 。偉仔忙於為奧斯卡做評審欣賞電影,一有時間就會睇戲 ,嘉玲都係評審之一,但係肯定佢暫時未有時間睇 。

精選娛聞,喺晒《娛果》
http://fb.com/appledailyent


攝影:陳慧安

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載