› 選擇地區
三藩市
紐約
洛杉磯
其他美國地區
香港 台灣 北美
 
2018年02月22日

【齊歡暢...】汪阿姐努力爭取:八和負責西九開台日及開台周演出

建立時間 (HKT): 0222 15:16

過年前兩度為咗西九文化區戲曲中心開火、怒斥當局「有事鍾無艷,無事夏迎春」嘅阿姐汪明荃,今日開開心心咁,以八和主席身份,請來上任特首梁振英同現任特首林鄭月娥,仲有中聯辦副主席楊健以及民政事務局局長劉江華到尖沙嘴The One一家酒樓出席八和會館新春團拜。

相關新聞:【今次避唔到】被迫同場 林鄭無視梁振英 手都唔握

先講番之前阿姐為乜事開火,一單係本月初,西九文化區戲曲中心預計年中竣工,任白慈善基金將負責開幕演出。阿姐知道之後有啲不滿,認為八和會館一直同當局全力合作,西九文化區表演藝術行政總監茹國烈去年亦曾提出由八和會館負責統籌中心開幕季,但o依家卻改由任白慈善基金會負責,汪明荃怒爆西九不尊重八和會館,不尊重業界傳統,不顧會館會員感受。嘩……

至於另一單令阿姐著火嘅,就係去年十月,西九文化區公佈委任方美昂(Ms Alison Friedman)為表演藝術總監,八和會館發聲明指,方美昂嘅背景同經驗主要係喺舞蹈、戲劇、音樂及多媒體表演,未有提及任何戲曲方面背景同經驗。阿姐稱對聘任十分愕然:「藝術總監係講緊個表演嘅方向,戲曲係百分百地道嘅表演,業界點同佢溝通?」質疑點解西九用西人。

相關新聞:【一生一封就夠】羅家英寫情書邀「下輩子在一起」 阿姐冧笑咁答…

時空返番去今午八和會館新春團拜。阿姐上台致辭時,咦,有講西九喎。阿姐話,經過多番爭取同協調之下,八和會館會負責西九文化區戲曲中心嘅開台日同開台周嘅演出,屆時八和弟子更會傾巢而出添;阿姐又話,八和今年都會舉行交流團,去北京重慶美國等地交流。

阿姐受訪時表示,同西九文化區戲曲中心嘅問題總算係解決咗,但到時開台日表演內容尚未決定,因為仲要開會。「o依家係達成咗啲合作嘅嘢,不過仲要計下Budget,一齊商量下做乜嘢。不過要等到正式簽咗合作協議先叫落實嘅。」

問到中間可有人斡旋?阿姐稱:「冇呀,都係同啲管理層傾。」咁對方有冇解釋過中間發生咩事?阿姐就話:「因為西九中間經過好多人事(變遷),新嘅領導未必清楚咁多嘢,一定要講清講楚先得。o依家叫做有好嘅進展啦。」問阿姐係咪滿意依家嘅結果?佢笑笑口話:「好啲啦。大家都係衷心合作嘅。」屆時會否親自演出?阿姐話:「唔會喇。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載