蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年02月22日

【咁大意…】Shine豪花十幾萬製作新歌 竟然同Ella鬧雙胞

19,733
最後更新: 0223 09:14 / 建立時間 (HKT): 0222 23:49

Shine即將喺3月2、3號假紅館舉行入行15週年演唱會《Shine Moments Live 2018》, 正密鑼緊鼓為演出做準備嘅成員徐天佑同黃又南,噚晚喺土瓜灣接受訪問,講到為咗今次演唱會特登製作新歌《不怕》,搵嚟黃偉文填詞,天佑話:「我哋好希望做一首類似《燕尾蝶》咁樣嘅歌,因為時代唔同咗,新歌希望以呢一代人對呢個城市嘅感情為主題,係一首正面嘅歌。」

佢哋話今次新歌係自資製作,花費十幾萬,為咗呢首歌特登喺英國請咗一名藝術家設計單曲封面,正當一切準備就緒嘅時候,佢哋發現原來新歌竟然同官恩娜啱啱派台嘅《寶貝兒》鬧出雙胞胎,即係同一位作曲人嘅作品。成員又南表示:「我哋都係新歌監製喺年三十晚從收音機聽到Ella呢首歌,先至知道竟然同我哋啱啱錄好嘅新歌係一模一樣,喺經過查詢下原來Ella早喺一年前已經收咗呢首歌,但因為佢生BB,所以斷斷續續到啱啱月中先推出咗,時間上啱啱畀我哋早咗少少。」

事件發現之後Shine表示已經即時查詢作曲人同華納方面,發現其實係作曲人徐繼宗不慎出現行政上嘅錯誤,天佑表示:「其實唱片公司都有一份歌單交畀歌手,歌手們就係呢啲歌單上面揀Demo,當時Ella揀到呢首歌之後,歌曲冇喺歌單上刪除,咁啱到我哋亦揀中咗仲錄好埋,於是就發生今日嘅事。」

又南表示:「作曲人事發後已經第一時間同我哋Say Sorry,其實呢件事唔係華納同我哋嘅錯,o依家大家仲喺度商討緊究竟應該點算 ,因為撞正農曆新年假期,唱片公司方面同我哋仲商量緊,希望下個星期會有好消息,因為首歌我哋真係好鍾意,而且相關嘅產品已經製作中,好希望可以完滿解決。」佢哋表示同一首歌鬧出雙胞胎好罕見,天佑表示:「上一次有同類事情已經係陳慧嫻嘅《千千闕歌》同梅姐嘅《夕陽之歌》,希望有呢一個案例,可以令事情有一個完滿嘅解決方法。」

至於官恩娜所屬嘅華納唱片公司發言人回應表示:「歌曲係喺去年收到,歌曲接近錄好階段時Ella發現自己懷孕,於是錄音工作暫停直到今年1月誕下第二位囡囡後,Ella希望將歌曲當做送畀兩位女兒嘅禮物於是將歌曲派台,後來 收到東亞唱片版權部查詢,先知道Shine亦錄好咗同一首歌鬧出雙胞胎事件。」華納發言人續稱:「向來同Shine關係好好 ,而且兩件都係喜事,Ella係慶祝第二個囡囡出世,而Shine就係慶祝紅館演唱會,雖然鬧出雙胞胎事件係尷尬,但都無辦法。」

寰亞音樂今晨即聲明稱:「寰亞音樂版權與旗下作曲人於推廣歌曲demo工作時發生溝通上的錯誤,導致華納唱片歌手官恩娜及Shine使用了相同的旋律進行歌曲製作,現正努力地與華納唱片及Shine經理人公司友好地協商,希望能儘快將問題圓滿地解決。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載