蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月07日

【韓流●動畫】那些年追過的H.O.T. 「元祖」是如何煉成的?

12,986
建立時間 (HKT): 0307 07:02

回憶,總是美好,令人懷念!相信韓國元祖男團H.O.T.係唔少80後嘅美好回憶,最近透過綜藝節目《無限挑戰》,竟然再次睇到全員重返舞台,就好似坐時光機咁,已經成為人妻或母親嘅粉絲,重回90年代做學生嘅時期,十幾歲時瘋狂追星嘅青春回憶,又再重現眼前。

話「瘋狂追星」係一啲都無誇張,當年H.O.T.開演唱會,連社會都隆重其事,或者應該係話嚴陣以待!當年嘅粉絲都仲係中學生,會為咗睇演唱會而早退,甚至早幾日就喺演唱會場外露宿,搞到韓國教育廳要頒禁令,唔准全國學生早退。演唱會後仲要驚動救護車,試過有200幾人high過頭暈低送院。地鐵都要特別延長營業時間,招呼睇演唱會嘅學生離開。喺1998年H.O.T.開嘅第一場演唱會亦打破多項記錄,包括最快賣晒飛、最多觀眾、出動最多保安等。

H.O.T.係韓國樂壇第一代男團,1996年出道至2001年解散,出咗五張專輯,全球總銷量超過五千萬張,幾乎橫掃三大電視台SBS、KBS同MBS嘅獎項,更加衝出韓國,打入中國市場,甚至連L.A.、華盛頓、加拿大等地都有佢哋嘅粉絲。

H.O.T.出道嘅時候,五位成員亦都係中學生,最細嘅李在元得16歲,讀高一;安七炫讀高二;文熙俊、張佑赫同Tony An讀高三。相隔17年,H.O.T.都將近40歲,或者都可以嗌佢哋「大叔」,不過號召力仍然驚人,淨係申請睇演唱會嘅人數就高達17萬,原因係粉絲們心中有數,今次嘅演出可能係最後一次,實在不容錯過!事關韓國娛樂公司之間競爭激烈,自從三位成員佑赫、Tony同在元喺2001年決定唔續約開始,往後嘅演藝事業發展都受到一定嘅壓力或打壓。即使唔以H.O.T.嘅名義,五位成員要同台都係被禁止,就算五位成員對合體一事心意一致,都難度極高,所以今次透過《無限挑戰》成功解決當中嘅繁瑣限制係相當難得。

H.O.T.全寫High-five of Teenager,就係為後生仔女發聲,因而令佢哋受年輕人歡迎。收錄喺首張專輯嘅歌曲《戰士的後代》抗議校園暴力,第二張專輯嘅《We are the future》就呼籲老師停止體罰學生,而第四張專輯中嘅《I Yah!》係為23名因大人疏忽而喺火災中喪生嘅小孩而寫。而H.O.T.嘅成員都好有才華,除咗唱得跳得rap得,主唱Kangta仲識作曲、作詞,其中《希望》就係佢一手包辦嘅作品。當年H.O.T.受歡迎嘅程度,係每兩個韓國學生,就有一個有佢哋嘅專輯,連穿衣打扮都會模仿。

雖然H.O.T.大受歡迎,但係回報極少。成員佑赫曾經寫過自白信,話普通韓國歌手賣一張唱片賺到100韓圜,即係$7港元,但係H.O.T.每人只係得20韓圜,扣埋稅淨返7韓圜,即係5仙港元。當年就因為面對唔公平,較早完約嘅佑赫、TONY同在元,想透過續約,增加唱片收入,可惜公司唔允許,於是佢哋選擇唔續約,結果H.O.T.解散。歌迷大受打擊,充滿憤怒,指摘娛樂公司,股價大跌,又喺公司外靜坐,遊行抗議,可惜始終改變唔到事實。

H.O.T.可以話係時代創造者,今時今日嘅偶像組合,都係用緊H.O.T.創立嘅模式,為K-Pop奠下基石,連歌迷嘅應援方法,包括衫、顏色、氣球、口號等,都係一直傳承至今,所以大家都稱H.O.T.係「元組男團」。雖然今次只係H.O.T.一次性合體,但係等待17年嘅盼望總算如願,而對於H.O.T.未來係咪會正式comeback,粉絲們亦重燃希望。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載