蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月08日

【贏口碑輸票房】《大樂師》加場一開四 顏卓靈戥唔抵:值得有更好

8,630
建立時間 (HKT): 0308 18:18

鄭中基憑馮志強導演嘅電影《大樂師.為愛配樂》,有望問鼎今屆香港電影金像獎最佳男主角,呢個星期一班演員好落力去謝票,以戲而論套戲拍得頗紮實,搞笑之餘亦拍出溫馨。不過撞正賀歲檔之後嘅淡季,電影上映7日,總上映場次係409場次,但票房累計只係得50萬元。

戲院在商言商,傳出會減上映場數都係可以理解,之前黃翠如喺facebook話睇完《大樂師》,想搵個時間再去睇多次,而facebook專頁「港唔斷戲」就繼續支持好片,呼籲大家拉埋朋友俾幾十蚊去支持下。星期日專頁已經講緊,一套電影上畫首個星期日嘅票房好重要,會影響到電影之後嘅排片,《蘋果》睇番星期日《大樂師.為愛配樂》嘅票房,只係得9.6萬,十分之少。

女主角顏卓靈(Cherry)話近日都收到唔少支持嘅聲音,佢今日以短訊回覆話:「我見到越來越多人支持,亦好多人睇完之後,唔止有好評價,亦叫我哋加油,呢個真係好感動。前日去戲院謝票係爆滿,觀眾唔知我哋會謝票,都寧願選擇坐第一行,仲有位認識嘅台灣記者,專誠飛過嚟睇,都令我好感動。」Cherry承認電影有進步空間,但值得有更好嘅命運同生命力,佢話:「導演係好有誠意同花心思去做,希望多啲觀眾入場嚟睇,套戲可以走耐啲,開心係周末會加場,到時見到大家。」

馮志強導演都話收到大家支持,佢今日以短訊回覆:「好多謝大家,收到業界朋友支持,同好多觀眾留言鼓勵,好多人仍然希望有時間、有機會睇到《大樂師.為愛配樂》。嚟緊星期六(10號)爭取多啲新場次,亦都同顏卓靈調動到啲時間同觀眾見面、謝票同分享,多謝大家。」

有口碑有人支持,或者電影未需要落畫住,睇番排片,《大樂師.為愛配樂》由原本今日一場場次,聽日就獲安排播兩場,星期六上升到有四場,想睇又未睇嘅支持者,就要安排定時間買飛睇啦。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載