蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月11日

【幾許豐語】完成電療後首度受訪 洪朝豐無悔錯過黃金治療期

119,752
建立時間 (HKT): 0311 00:00

走過高山,洪朝豐面對的是一個比一個更低的谷。

相關新聞:【幾許豐語】由討厭到接受自己 洪朝豐想出自傳總結前半生

58歲的前DJ洪朝豐,20年來已飽受躁鬱症纏擾,要終生服藥,豈料去年10月洪朝豐確診舌癌,兩個月後要切脷保命,竟再發現患上淋巴癌,接連不幸事將洪朝豐人生推到最低點。幸經過多個月治療後,洪朝豐總算撐過來,在本月5日進行完最後一次電療後,洪朝豐重新振作,重過新生。日前,洪朝豐首次站出來接受《蘋果》專訪,細談今次抗癌經歷,眼前的他看來精神不俗。

今次是洪朝豐主動相約記者做訪問,對於今次站出來分享抗癌經歷原因,洪朝豐說:「今次病,今次落難,得到好多人幫助支持同鼓勵,包括朋友同學生,如果唔係得到佢哋幫助,我冇咁容易企番起身、冇咁容易全面接受自己,如果將佢哋對我嘅幫助當做一種功德嘅話,我希望將呢種功德透過我嘅訪問擴散開去,令到多啲人受到幫助,我今次之所以個精神、個心靈好番,都需要走過好長嘅路,我覺得係值得同人分享。」

相關新聞:【幾許豐語】分開30年再與前妻同居 洪朝豐感激悉心照料

手術切去洪朝豐半條舌頭,他表示進食和講說話也得小心翼翼:「我呢邊(左邊)牙床都出咗事,我有一寸長黃色嘅膿,係癌前病變,所以醫生除咗開刀做修復之外,幫我去咗啲膿,啲膿係黐住牙肉嘅牙床,佢要確保呢啲癌前病變有冇入到我牙床骨,如果有,要成段攞走,因為要削我牙床骨,所以下邊(左下方)有幾隻牙都比佢攞走咗。但削咗牙床骨同牙肉都唔會生番,所以個手術要將新造嘅脷蓋住牙床骨,蓋住之後新造嘅脷唔識郁,要靠我原本條脷嘅帶動先郁到,所以我講嘢發音上我有兩個音發得好辛苦,包括K音同埋個G音。同埋,當我講嘢同食嘢嘅時候,我上邊(右邊)嘅牙係會鎅親條脷面,脷底又會比下邊啲牙鎅親,有時食嘢會咬到,條脷痛,講嘢都要就住,如果唔係俾啲牙鎅到會痛。」

上年發現患癌後洪朝豐因為不想做手術失去舌頭,所以上大陸找中醫治療(新聞連結: http://bit.ly/2ygr9bP ),結果錯過了黃金治療期,可有後悔?

洪朝豐語氣肯定說:「冇,我從來做事都唔後悔,我覺得每一個生命嘅決定,都係一場賭博,有時會贏有時會輸,最緊要你願賭服輸。我開頭唔想開刀,因為我覺得我聲音係我最大寶庫,我想盡辦法留住把聲,所以我拒絕開刀...到最後我冇法子唔開刀,因為都冇路走,卒之醫生安排咗我12月11號開刀。卒之我淋巴受到感染,得到淋巴癌。」

採訪:魯吉
攝影:周樂恒
拍片:馮嘉銘
協力:徐家希

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載