蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月11日

【幾許豐語】由討厭到接受自己 洪朝豐想出自傳總結前半生

24,955
建立時間 (HKT): 0311 00:00

58歲的前DJ洪朝豐,日前主動相約《蘋果》做獨家訪問,問到他先後受躁鬱症、舌癌、淋巴癌困擾,可覺上天對自己不公?

洪朝豐表示割去一半舌頭後,左邊開刀取出了24粒淋巴核,驗出其中4粒有癌細胞,樣貌又腫又瘦,一度很討厭自己:「覺得自己好核突,接受唔到自己,不嬲我覺得自己相貌娟好,不致於要咁樣,加上你會擔心經濟,突然間冇咗謀生能力,同埋當時我以為呢一世只可以食流質嘅嘢,我條脷蓋咗我牙床(左邊),我門牙點合得埋呢?我條脷喺度吖嘛,我呢邊(右邊)又點合埋?我睇唔到個出路。」

日前洪朝豐網上撰文表示電療令味覺倒退,嚐不到甜味、酸味,但他仍自覺好彩:「o依家30次電療之後,我好好彩,只係冇咗甜味冇咗酸味,我仲有鹹味,但嗰陣時電療仲未結束時,我以為我只可以食流質食物,仲要係冇味道,我會諗,一個人生命中,食嘢咁重要,但o依家我要面對食嘢只係維生。」

除了進食問題,洪朝豐表示瞓覺時會不停流口水,轍夜難眠:「食係一個問題,瞓係一個問題,加上電療係好攰,會容易亂諗嘢,喺咁嘅情況下,我睇唔到有希望。」

廿多年前洪朝豐因抑鬱狂躁症,變得一無所有,甚至要住進精神病院22日,相比之下,洪朝豐覺得舌癌打擊更大:「原本我當時社會聲譽好好,之後好多媒體寫到我好不堪,但我經過好長時間企番起身,我有自己收入,教人打坐、唱歌、講嘢點樣用聲,我以為呢個搵食工具可以陪我陪到90歲。」

可惜事與願違,舌癌令洪朝豐失去寄託:「但個天『噗』一聲全部攞走晒,受嘅打擊好大。我o依家冇咗聲我點搵食?所以覺得個天好奇怪,究竟想點?」就算精神科醫生好言安慰上天安排總有特別,但洪朝豐仍反問:「當時我覺得乜嘢特別嘢呀,想我點啫?」

負面想法之後諗通咗,洪朝豐電療期間覺得樣貌嚇人,避免出街見人:「o依家完全接受到晒自己,原本我條頸因為電療關係係黑色㗎,o依家淺色咗好多,我用一啲果油搽佢,慢慢黑色嘅皮甩咗,好咗好多,但o依家啲位仲痛同痕。如果你見到我,覺得我條頸好核突,唔係我問題,係你問題,又或者你見到我樣唔同晒,話我條脷咁核突,呢個都係你問題,唔係我問題,當我完全接受咗自己,我係一個自由嘅人,我再冇理會啲人點樣睇我。」

洪朝豐多年前購入藍田公屋,不用擔心居住問題,但癌症令他不能工作,縱有兒子供養生活仍過得不易,幸一班學生、朋友經濟支持,他說:「營養奶加埋湯水每個月開支最少6000蚊,電療每一日96蚊,30次差不多3000蚊,換言之我嗰個月淨係食同埋電療已經9000蚊。有學生發起每一個同學每一個月貢獻100蚊,10個人咪有1000蚊,無論醫療飲食方面有小小支持。我啲朋友好好,佢哋嚟探我,跟住走嘅時候俾封利是我,我完全冇諗過,好托賴。」

談未來計劃,洪朝豐希望出自傳:「係時候總結我前半生,寫一本小說,裡邊有好多自傳色彩,喺我生命真正發生過,我想將本書獻俾我媽媽,雖然佢離開咗5年,但我仍然好掛住佢。」

採訪:魯吉
攝影:周樂恒
拍片:馮嘉銘
協力:徐家希

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載