蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月13日

【失蹤人口】與李美鳳楊寶玲同屆港姐 49歲不老張鳳妮氣質依然

185,091
最後更新: 0313 23:26 / 建立時間 (HKT): 0313 18:00

(新增回應及影片)

最近無綫劇集《流氓大亨》,其中一場萬梓良喺法庭外怒打人渣吳啟華,唔跟劇本亦冇單聲一Roll機就真係起勢追住佢嚟打。呢場戲,萬子真係「立」起個垃圾筒一嘢仆落去再兜口兜面一拳就打落去,令吳啟華大怒,反晒面。

萬子嘅方法演技,對手不分男女。重播又重播嘅《他來自江湖》,有場戲係萬子發現啪丸wet妹張鳳妮吸毒,大力摑佢,扯住佢頭髮入廁所,開水兜頭淋,萬子七情上面爆青筋演出,張鳳妮真係俾佢搖到失魂。嗰場戲,拍於1989年,都好激。

講起張鳳妮,佢依家點呢?佢都有份拍《餐餐有宋家》,早前宣萱貼出《餐餐有宋家》RE-U大合照,原來佢哋約埋出嚟飲茶,相中有宣萱、尹揚明、盧宛茵、陳曼娜、梁葆貞、梁家仁、黃金己瑩同鄧兆尊,但就未見古天樂同張鳳妮喺相片中現身。

其實張鳳妮都有出席下RE-U活動0架,噚晚趙學而貼咗輯飯局合照,相中除咗有胡楓、陳曼娜、黃金己瑩、盧宛茵、羅敏莊等之外,仲有張鳳妮!已婚生子嘅佢,依家喺吉隆坡定居,難得返港,同舊同事聚聚。相中見佢精神飽滿,容光煥發,完全唔似49歲喎。

有份出席飯局嘅周家蔚話,今次gathering搞手係曼娜姐,至於張鳳妮,周家蔚話佢都係第一次見:「喺電視睇過佢,我覺得佢keep得好好,但係真人都係第一次見。我都有同佢講:『你保養得好好呀!』」

講番少少張鳳妮嘅歷史啦,佢係87年香港小姐出身,與楊寶玲、李美鳳同屆,獲「最受佳麗歡迎」,花名叫「鳳梨」,拍過好多劇,處女作係87年處境劇《城巿故事》,之後拍過《小小大丈夫》、《他來自江湖》、《蜀山奇俠之仙侶奇緣》、《同居三人組》、《餐餐有宋家》、《愛情三角錯》、《天地男兒》、《900重案追兇》等,而且戲份都重,除咗演秘書,亦有演下巴辣港女咁樣樣。

97年拍完《苗翠花》之後,張鳳妮去大馬發展拍電視劇,由友人介紹下認識商人傅仰峯(阿Paul)。阿Paul出身富裕家庭,其家族喺大馬同海外有唔少生意,曾於澳洲念書,好少睇電視劇,佢同張鳳妮一見鍾情,但拍拖初期都唔知原來女友係藝人。婚後張鳳妮專心做全職太太/媽咪,生咗三個小朋友,間唔中返港。雖然做咗闊太,但張鳳妮仍然慳家,有一年佢試過舉家返港省親,碰啱公司大減價,買咗成六箱嘢,最多嘅就係BB啲嘢,而且湊B全程一腳踢親力親為。呢位靚太真係好可愛。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載