蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月15日

【片段曝光】荷李活試鏡冇得泊車唔俾搭Lift 劉綽琪:因為你係演員

98,697
建立時間 (HKT): 0315 00:01

劉綽琪(對,前港姐、拍過龜苓膏嗰個)用十年時間闖荷李活,上YouTube都會搵佢喺美國試鏡的短片。

相關新聞:【獨家專訪】孑然一身再無牽掛 43歲劉綽琪美國回流開節目

綜合經驗,劉綽琪給想勇闖荷李活的香港演員以下貼士:

1.第一,你要有充足嘅生活費。衣食住行無一不是錢,同埋,除非有電影/劇集同你簽咗約一定有工開,否則你的演藝生活,將會是無休止的試鏡。「二十次casting先至會中一次。」這位過來人稱。冇戲拍就手停口停。「你真係要有足夠嘅資金,尤其係你冇屋企人嘅時候。有時你會幾失望0架。所以你要抹咗自己嗰套,佢哋演戲嘅方法同我哋好唔同,你要將自己杯水倒咗佢、入佢哋嗰啲,但你又唔可以乜都唔識。如果你乜都唔識,咁佢點解要用你呢?」

相關新聞:【去年喪夫】劉綽琪承受喪父之痛:剩番我一個好似孤兒咁…

2.都係試鏡嘅問題。荷李活是很有規模,樣樣都有好清晰嘅制度,試鏡都會有專屬的試鏡導演,而這些casting director仲會開班。學費不便宜,有啲約50美金一班。劉綽琪當然上過,仲上唔少:「你要上好多class。嗰啲casting director好有錢,佢哋唔止有office,仲搞好多casting director workshop。如果你上,然後佢見你不停咁上,咁佢有咩roles呢,咁佢咪會call你囉。」要上咁多課程呀workshop,邊有咁多錢?「所以有啲演員要做bar tender、要做waiter,係因為演員呢個行業真係好貴。」

3.二十次casting先至會中一次,咁幾耐先儲到二十次casting?劉綽琪表示好彩的話,一個月會中一兩次。「有時唔好彩嘅話,可能一兩個月都冇0架,但係你會有training囉。所以到後期你會覺得,咦,點解個個演員都識得剪片打燈又拍埋嘢嘅?咁自己咪又去學囉。我又唔會覺得係低潮,我覺得幾好玩。依家你叫我roll機拍嘢,我OK 0架!」

4.即使你有機會casting,都要有心理準備:執生。「第一,你唔知部機擺喺邊,而且佢可能搵個reader俾你(即對手),可能佢今日已經背咗一百次同一樣嘅對白喇,佢完全唔俾感情你,就咁噏啲對白俾你。我話俾你聽,casting audition(試鏡選角)係比on set難,因為on set有道具。初頭我完全手足無措:『我可唔可以再嚟過?』冇機會喇。」

5.留意番,去參加試鏡嘅演員,去到試鏡的場地,首先,你唔可以用嗰個停車場,第二,唔可以搭lift。不是因為迷信呀bad luck呀,而係因為一個字:NO。「我哋係演員,唔搭得lift嘅,同埋唔以喺嗰個停車場停車。因為佢一個casting office,一個朝頭早cast百幾二百人,如果個個泊佢個停車場,咁就真係唔得掂,所以架車要泊到老遠;同樣個個都用佢架lift都唔掂。」

好灰?唔係。絕對唔係。只要你中咗一個job,劇集又好,廣告又好,現實啲講,你真係只要中咗一個,分分鐘不愁生活——最低限度,短時期之內,係。

「譬如我拍咗一個廣告,佢每播一次,我都有錢收;如果YouTube播,咁又係另一嚿錢。所以你見到有啲美國演員,可能幾年都唔拍戲,點解仲咁風光?因為可能佢拍咗一套戲。比如佢拍咗《Friends》咁,佢真係呢世都唔使憂,因為不停重播不停重播,佢哋每三個月就有一張支票0架喇!」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載