› 選擇地區
三藩市
紐約
洛杉磯
其他美國地區
香港 台灣 北美
 
2018年03月16日

【《來生》打頭陣】HKTV製作排隊登陸奇妙電視 為圓王維基電視夢

建立時間 (HKT): 0316 00:00

「魔童」王維基2012年為港視向政府申請免費牌照,仲用銀彈政策喺無綫邀請好多藝人過檔,搞到無綫亂晒腳,結果要加薪留人。雖然嗰陣港視製作咗唔少劇集,為開台做好準備,可惜喺13年因為「一男子」嘅因素而夢碎,結果製作好嘅劇集改於網上播放。

不過有質素嘅劇集,又點會冇人欣賞,嗰陣港視製作嘅《警界線》、《選戰》同《來生不做香港人》等等,掀起咗一陣煲劇潮(新聞連結: http://bit.ly/2FK4fcS )。事隔接近4年,免費電視牌照亦比當年增加咗兩個,永恆亞視又再復活,咁港視呢?

奇妙電視官網宣佈,下月16日,逢周一至周五晚上20:30將會播出《來生不做香港人》!

據《蘋果》了解,《來生》只係頭炮,之後陸續會有其他港視劇集同綜藝播出。港視方面稱:「本著為大眾提供更多免費娛樂節目選擇的宗旨,香港電視已落實將其電視製作,於奇妙電視的免費頻道播放。」

奇妙發言人就謂:「奇妙電視將於四月中旬開始播放香港電視之製作,讓觀眾於免費頻道欣賞有關節目。奇妙電視致力為觀眾搜羅高質素節目。作為本港免費電視,奇妙電視鼓勵業界發展,讓觀眾欣賞多元化精彩節目,提供免費娛樂真‧選擇。」

有關方面不願披露購買港視劇集播映權之細節,如作價多少等等,但據了解,港視……即王維基,其實價錢多少不是最重要問題,始終這些製作已在網上播放了一段時間,但今次可以正正式式由免費電視播出,可以話係還咗王維基同埋一班製作人員嘅心願。知情者稱:「大家都好希望港視劇集可以喺免費電視上播出!不過始終幕後班底已經解散,所以再搞劇集嘅機會唔大!」

《來生》總導演陸天華與一眾有份參與該劇嘅台前幕後都有群組討論呢件事,個個都覺得好開心,陸天華導演回覆查詢時話:「播其他當然好,多些香港電視劇給觀眾看到。」男主角潘燦良接受本報訪問時稱:「我唔知喎,有啲咁嘅事?哈哈,當然好啦!我估好多人都未睇過!謝謝告知!」

有份演出嘅艾威亦表示全不知情,當然亦感欣慰。如今艾威忙於拍ViuTV嘅《VR驅魔人》,問他可期望與港視再合作呢?他稱:「我有同王生聯絡,佢話自己都有睇《無間道》,覺得好有劇味,不過佢0依家會全副心機搞網購。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載