› 選擇地區
三藩市
紐約
洛杉磯
其他美國地區
香港 台灣 北美
 
2018年03月16日

【網民派嬲】阿Bob任《美女廚房》主持 搶King Jer地盤洗版回應指摘

建立時間 (HKT): 0316 00:00

食得唔好嘥,拍節目都係,就算係十幾年前嘅節目都可以摷番嚟繼續拍。之前大台喺節目巡禮預告過,《美女廚房》10周年有意再開拍《美女廚房》,製造新一班地獄廚神。咁主持人呢?有傳新一輯節目,唔會再由以往鐵腳方力申、鄭中基、梁漢文等人主持,而係換上「老是常出現」嘅Bob林盛斌、蕭正楠同張振朗。

相關新聞:【肥醜就改唔到】600字答謝批評 阿Bob承諾改善:會控制聲量

「King Jer娛樂台」前日都出咗個post,重溫一下舊節目,又有大大個Bob喺正張相中間,問fans會唔會睇。有人留言話舊主持先係精髓,換晒成個節目冇靈魂,亦都有人話,睇新主持嘅相,已經覺得嘈,而且不少留言都將矛頭直指Bob:

「唔洗睇啦,尤其是最煩X嗰個光頭佬」;
「阿Bob同蕭正楠太趕客」;
「聽到有阿Bob都唔想睇,嘈到」;
「人哋未講完佢搭咀嘈住晒」;
「你出嚟都冇用,我哋罷睇」;

相關新聞:【wONdEr】四個小孩的媽媽 24小時馬不停蹄湊仔實錄

網絡世界傳得好快,阿Bob見到有人講佢,都有出現喺King Jer個post到留言洗版式回覆,tag番大部份支持佢嘅人逐個多謝,對於留言鬧佢煩嘅人,都落足心機搭嗲講兩句,話會好好反省。

驟眼睇,仲以為呢個係Bob facebook,反而King Jer喺主場就一粒聲都冇出,唔知貴人事忙唔得閒覆,定係見到留言太頭痛唔想覆,至於一班支持Bob者,就讚佢好好EQ,俾人鬧都咁好脾氣。

Bob喺King Jer facebook留言覆網民,本來夠晒公關,豈料惹來反感。Bob噚日回覆傳媒時話:「哈哈,同大家互動一下,傾吓偈啫!」佢好阿Q精神附送三個笑臉公仔。Bob否認「踩場」,佢話:「冇踩埸啦,其實我好客氣同網友傾偈,有唔少網友話我好勤力同真心回覆。」

Bob經此一事,有感而發,再以長文回覆代達心情,表示明白上一輯嘅主持非常出色,節目算得上係經典同集體回憶,會吸納網民意見:「各位網友們嘅留言,無論正面定負面,對我嚟講都係好重要嘅推動力。」佢又承認做主持經驗幼嫩,亦吸納咗意見試過喺另一個節目好好控制聲量,同試下冇咁浮誇。

阿Bob長文回覆,可睇另文。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載