蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年03月25日

【向膠劇宣戰】網絡文化VS傳統電視 張繼聰《向西聞記》夠貼地

10,396
建立時間 (HKT): 0325 00:00

嚟到2018年呢個科技資訊爆炸嘅年代,只要你手上有一部手提電話,要喺網絡世界暢所欲言甚至作返篇文,都真係「其實唔難」,不過,真正嘅困難就係喺呢個一秒閒閒地有上千篇文出現嘅世界,你到底要點樣突圍而出?

相關新聞:【百花齊放最好】網劇誓成主流撼低電視? 張繼聰:冇得去比較

結果又真係有人成功彈出,講緊嘅就係05年起活躍嘅網絡作家向西村上春樹,曾經喺討論區發表《東莞的森林》被無數網民日日催故,喺12年更出書《一路向西》,其後更被改篇成電影,一個屬於香港嘅故事就咁誕生。

其實向西嘅作品自從電影《一路向西》之後都陸續有喺各大平台出現,最近更有網劇《向西聞記》,由近排被大台因為合約問題而封殺嘅張繼聰擔綱主演首個單元,就封殺事件老婆謝安琪都有開腔回應(新聞連結: https://bit.ly/2C8ZPdi )。今次故事借由張繼聰飾演嘅「傳心師」Kelvin,道盡香港稀奇古怪而又被社會視若無睹嘅歪風,故事當中穿插住唔少極度諷刺嘅黑色幽默同網絡文化,例如「動物傳心」、「賽馬傳心貼士」、「塑膠龜」、「旅行青蛙」、「唔同蠢女人拍拖」、「中女玩夠搵人埋單」等等。

今次劇集充分運用網劇優點,就係制肘相比電視較少,劇集當中有粗口、有床戲、連女主角胡杏兒都破格講「收X」,而所幸,劇集當中唔係粗口橫飛,而係適時適量加插,再加上張繼聰不時會打破「第四面牆」同觀眾剖白內心,令到成件事更加貼地,令觀眾覺得呢個係一個朋友嘅故事一樣。

《向西聞記》將會分成十三個單元,首兩集由張繼聰主演嘅「畜生傳心師」已經分別喺3月8號及3月16號上載咗喺Hmvod供大眾免費觀看,不過第三集到3 月25號都未見,令到唔少已經上癮嘅觀眾好心急,《蘋果》問過老闆蕭定一,對方經電話回覆話:「四月一號開始會去台灣拍第三集,之後陸續會拍其他,應該五月頭會拍晒,五月尾會十三集一次過擺晒上網。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載