› 選擇地區
三藩市
紐約
洛杉磯
其他美國地區
香港 台灣 北美
 
2018年04月01日

【哥哥‧15年】由零開始偷偷想到落淚 明哥記住了這一幕:走廊的煙break

建立時間 (HKT): 0401 00:02

4月1日,無心睡眠,想你--張國榮。

相關新聞:【哥哥‧15年】哥哥「OK」手勢再現文華 唐鶴德:知心惟有月

「哥哥」張國榮離開了15年,02年他和黃耀明合作推出EP《CROSS OVER》,成為哥哥最後的唱片,當時哥哥已受抑鬱症和胃酸倒流困擾,錄音期間情緒低落,要休息抽煙解愁,那個畫面,明哥至今念念不忘。

【「要唔要陪你一齊食煙?」】
「記得喺錄音室,佢take一個break去食煙,但其實佢好似已經戒咗煙好耐。我諗佢嗰排心情有少少麻麻哋,有少少煩,真係好似佢喺電影裏面好cool嘅形象,我問要唔要陪你一齊食煙,大家就喺走廊take煙break傾偈,呢個係好難忘嘅moment。

相關新聞:【哥哥‧15年】一片重溫哥哥經典電影

「當時佢有提過籌備緊電影,有少少壓力,好似唔係好順,佢又有少少唔舒服,錄音時察覺佢聲音好沙。」

《這麽遠 那麽近》由哥哥作曲和讀白,其中有句:「我懷疑嗰次把聲好沙嗰個就係你」,就是刻意為哥哥加上去的。主唱的明哥說:「當時佢同我講,佢有少少胃液倒流,所以影響咗把聲。」

【半夜收電話:佢覺得會頂唔住】
當時的哥哥,身和心都病了,很多工作,也變得力不從心。明哥憶述:「唱片做完嘅時候,有日公司call大家返去開會,話plan好晒拍幾多個MV、做乜嘢宣傳活動、封套會點拍……佢就好開心,開完會聽日就去拍。

「跟住半夜收到唱片公司電話:『哥哥聽日唔會嚟,佢覺得好大壓力,又要拍呢樣又要拍嗰樣,佢覺得都係會頂唔住,你一個人頂住先。』感受到佢開始俾呢個病影響,有啲事會突然間覺得好大壓力,承受唔到,不如cut晒啲programme。」

【聽《玻璃之情》:其實預言緊呢件事】
哥哥和明哥都有一個共通點,大家都選擇了同性做伴侶,97年哥哥在個唱上宣示唐鶴德的摯愛地位,唱《月亮代表我的心》表白愛慕,明哥則於2012年在達明一派演唱會上公開性取向,問到有否受哥哥影響而「出櫃」?明哥坦言:「其實就冇特別影響到,首先,我由好早嘅達明一派開始,雖然冇公開出櫃,但我唔會避免去討論關於同性戀話題,由《禁色》到《忘記她是他》到《光天化日》,我都有攞出嚟講。」

不過,明哥話哥哥絕對係一支強心針,更被哥哥和唐唐的拖手的畫面震撼了:「佢能夠公開自己性取向,其實對我嚟講,震撼未必係最大,我反而覺得佢同唐生喺街拖住手影相,更加令人覺得場面好感人,呢個係好重要,能夠將同性之間愛嘅感覺公開流露出嚟,係更加大嘅重要畫面。我覺得尤其佢跟住又拍《春光乍洩》,都係畀咗好多動力之後嘅人。」

明哥最喜歡哥哥和王家衛合作的電影,包括《阿飛正傳》、《春光乍洩》:「歌都有好多鍾意,由佢快歌《無心睡眠》、《黑色午夜》到拿手情歌《路過蜻蜓》,仲有一隻歌《玻璃之情》,佢死咗之後先推出,我都覺得好好。當然聽嘅時候好傷感,我諗佢錄嘅時候冇諗過呢件事發生,但呢隻歌後來聽番,其實都預言緊呢件事。生命真係好奇怪,佢留低好多好好嘅歌同電影。」

攝影:陳慧安
攝錄:廖達燊
化妝:Vanessa Wong

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載