› 選擇地區
三藩市
紐約
洛杉磯
其他美國地區
香港 台灣 北美
 
2018年04月01日

【哥哥‧15年】偶像中的偶像 謝安琪:佢嘅最高境界係佢嘅一份瀟灑

建立時間 (HKT): 0401 00:00

哥哥張國榮除咗係唔少市民嘅偶像,仲係一班偶像中嘅偶像,唔少圈中人對哥哥都好尊敬,仲會視哥哥為學習對象。

相關新聞:【哥哥‧15年】哥哥「OK」手勢再現文華 唐鶴德:知心惟有月

河國榮:「哥哥好似走咗好耐,唔只15年,當日聽到佢走消息好愕然,最緊要係佢主動去做,係唔敢相信。佢離開唔只係心痛,係少咗一個人才,無論佢演戲同唱歌,佢都做盡自己功夫心機,所以佢啲嘢好靚。佢唱歌有佢特色,技巧非一般,所以好特別,好多人去扮,但好少人扮到,佢喺台上唱歌都似做戲。」

謝安琪:「我覺得喺舞臺上面每個歌手都好坦白,你自己係乜嘢人就好坦露咗自己,哥哥又一樣嘢係其他人好難模仿,佢嘅最高境界係佢嘅一份瀟灑,我覺得喺舞臺上面揮灑自如,心態好瀟灑,係好難而且係好有型,唔同階段嘅哥哥都有唔同階段嘅美態同吸引力,係令我最懷念。」

相關新聞:【哥哥‧15年】一片重溫哥哥經典電影

薛凱琪 :「實在太多歌係鍾意同埋想唱,無奈地呢個唔係一個演唱會,所以...『為你鍾情...傾我至誠...請你珍藏這份情...』,第時有機會唱晒成首畀大家聽;我最掛住哥哥...其實真係講唔到一樣嘢,我掛住佢嘅電影、我掛住佢嘅歌曲,我掛住我可以再一次入戲院睇佢嘅騷,我掛住佢嘅訪問,我掛住佢嘅自然,每一方面哥哥嘅嘢,我都好掛住。」

張敬軒:「《為你鍾情》除左係哥哥嘅一首歌,仲係哥哥嘅餐廳。哥哥死左呢幾年,令我最掛住嘅係,哥哥喺台上嘅風采,佢嘅優雅同魅力,係好難模仿,係佢嘅自信同藝術細胞,由心而發嘅,喺我心目中張國榮只有一個。」

黎瑞恩說:「我唔唱歌嘅時候,哥哥復出番,我哋冇見過面,但我哋由細聽佢啲歌長大,佢做戲非常好,我睇佢演唱會非常開心,佢收放自如,係超級巨星,亦係我兒時偶像。」

劉德華說:「好快就15年,哥哥離開我哋一段時間,好多喜歡佢嘅人,都仍然覺得佢留喺我哋心裏面,希望趁呢個時候,同大家懷念一下哥哥,希望佢喺第二度都幸福快樂。」

劉美君:「係我對哥哥最深刻歌,細個唔開心時呢幾句歌詞好墮入我真實情景,永遠一聽就諗番發生件事。最惦念哥哥好nice,我細細個就識佢,臨決定移民離開娛樂圈前,喺酒店樓下見到哥哥飲緊嘢,佢攬住我叫我好好保重,好記得嗰種哥哥對妹妹關懷之情係點樣。」

張智霖:「好多嘢都好掛住,好多佢演過嘅電影好似《英雄本色》,時常都會百看不厭,《縱橫四海》甚至乎賀歲片都時想睇,佢嘅歌時常在自己心裏面,有一個永遠嘅playlist一樣。」他續說:「佢嘅歌由細陪到我大,認識咗哥哥、亦都係佢打牌嘅腳,喺佢度學到牌品好好,當時係好難忘嘅時光,我記得喺哥哥屋企打牌,又會喺佢屋企食飯 ,發覺佢對佢工人好好,我問佢究竟係一個點樣嘅觀念?佢話有時唔係要鬧死人,係要冧死人,我覺得好受用,係我喺哥哥身上學到對任何人都咁一致嘅態度。佢全部嘅歌我都熟悉,哥哥就好似喺我心裏面基本上冇離開過。」

關之琳:「同Leslie認識係我第一部電視劇開始,嗰時完全唔識演戲,佢幫咗我好多,後來大家做咗朋友,佢好錫我,好似妹妹咁,最掛住佢叫我把聲,佢唔係叫我Rosamund,係叫另一個名, 同佢拍戲嘅影像我都仲記得,佢唱歌特別有味道、有感情 ,4月1號佢過世嗰日,真係嚇到我暈低咗, 好快過咗15年嘞,我覺得佢仲喺度、仲喺周圍,只係去咗旅行。」

採訪:張俊銘、盧妹、黃曉妍、馬建華

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載