› 選擇地區
三藩市
紐約
洛杉磯
其他美國地區
香港 台灣 北美
 
2018年04月02日

【如果我繼續喺麗的】蔡楓華重提「剎那光輝唔代表永恆」:我過錯咗去TVB

建立時間 (HKT): 0402 15:35

蔡楓華、陳秀雯、李龍基、劉雅麗及葉振棠等歌手,噚晚喺灣仔伊館擔任「真.經典電視主題曲演唱會」嘉賓,蔡楓華稱百感交雜:「1986年,我喺伊館開過6場騷,當時喺麗的拍完《我要高飛》之後,就過檔去TVB,感覺好光榮嘅,不過我過錯咗去TVB,因為整咗個《勁歌金曲》畀我,如果我繼續喺麗的,就唔會出咗『剎那光輝唔代表永恆』呢件事。其實蔡楓華唔只識唱歌,仲好幽默,啲人話『剎那光輝唔代表永恆』令我走下坡,其實錯晒囉!有個巨星俾我掹到車邊,嗰個就係張國榮先生。」

相關新聞:【好耐冇喺幕前演出】唔急飲新抱茶!陳秀雯:再講佢返到屋企就同我反枱

蔡楓華完騷之後接受訪問,佢感觸良多:「唱咗好多以前嘅歌,好有意義,好多年冇試過同其他歌手一齊做騷,記憶中喺香港未試過,好有親切感,好榮幸。」問到話掹哥哥車邊係咪搞gag?蔡楓華話:「我絕對係掹哥哥車邊,啲人話『剎那光輝唔代表永恆』係揶揄哥哥,其實唔係,大家知今日係咩日子,係一個好特別嘅日子,我唔想講咁多,總之就係百感良多。」

佢繼續話自己有懷緬哥哥,記得當年拍劇,有好多術語都唔識,都係哥哥教佢,哥哥仲教佢打枱波,又一齊行百萬行,蔡楓華突然認真咁話:「我要澄清,我唔係成日講Danny(陳百強)、阿梅同哥哥去增強自己,我哋年少時真係好friend,阿倫(譚詠麟)大我哋一半。嗰時我哋成日去跳舞去玩,加上我又係《勁歌》主持,基本上講得出嘅歌手我都識,鄧麗君嗰時都成日同我去跳舞㗎。」

不停緬懷昔日風光,講講下,蔡楓華忽然話:「當年唔想拍咁多電影,覺得唔不適合我,o依家諗起都有啲後悔,o依家啲小生好幸福,拍一部戲,市場好大,賺到成億,當年我哋環境冇可能,o依家冇人會搵我,我係歌星,視劇界嘅前輩,希望大家支持粵語歌。我都想開演唱會。」

1985年《勁歌金曲》第二季季選,哥哥張國榮連奪三首金曲,當晚無綫直播哥哥喺紅館演唱會領獎時刻,哥哥更演繹蔡楓華首《愛不是遊戲》,蔡楓華當晚做《勁歌》主持,當住全港觀眾面前爆出一句「剎那光輝不是永恆」,令蔡楓華《勁歌》主持工作被抽起(新聞連結: https://bit.ly/2GqI4wD )。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載