蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年04月17日

【自身故事投射】借名氣尋親 王貽興派洋蔥:要擺低先可以向前行

43,495
建立時間 (HKT): 0417 00:00

ViuTV劇集《VR驅魔人》已經進入結局篇,喺之前播映嘅單元,借住嗰個VR裝置,玩咗好多地道題材之餘,又有人情味嘅嘢,好似係90年代好多人捧場嘅殭屍片,仲有啲係向周星馳致敬嘅片段,再加上王貽興同劉翁又碌盡人情咭,搵咗唔少圈中好友客串演出,有啲仲係好耐冇喺幕前出現嘅藝人,睇落真係好驚喜!

今晚嗰集開始,可以話係大派洋蔥,亦都係王貽興嘅寫照,話說吳麗珠臨終前話俾囡囡、飾演天氣女郎嘅江若琳知,原來江若琳係詹瑞文嘅私生女,所以江若琳希望可以搵番爸爸,問番當年要離棄佢哋兩母女嘅原因。王貽興為咗女神江若琳,二話不說幫到底,結果令到佢哋兩父女見面,仲令江若琳釋懷咗件事。

噚日王貽興接受《蘋果》訪問,講到江若琳同詹瑞文呢幕戲,佢話:「其實呢個故事嘅藍本係我自己嘅親生經歷,喺劇裏面,江若琳一直都唔啱做主播,但係佢之所以喺幕前,因為希望可以佢嘅生父見到佢個名,可以搵到走去搵番佢哋,好似我自己咁多年做呢一行,都係希望揼低我同媽咪30年嘅老竇,可以搵番我哋!」

不過王貽興話:「當然現實唔係好似劇裏面咁美好,亦都冇好似黃秋生咁幸運,所以咁多年嚟,都唔可以同自己嘅親生爸爸相認。今次係自己自編自導自演,亦都唔知有冇下次,所以決定將自己嘅經歷加入去,令到成件事更加真實。」佢仲補充話:「《VR》嘅故事係要擺低自己心魔、放下同成長,於是乎唔單只演出嗰個人,甚至寫嗰同導嗰個人都要放低一啲嘢,咁樣故事先可動人。好似喺小豪哥(錢小豪)、陳國邦嘅故事,既然做人控制唔到過去,要擺低先可以向前行,所以江若琳嘅故事做咗最後大結局篇嘅內容。」

喺最後一場係詹Sir着住西裝同江若琳相擁而哭,王貽興話呢場戲係一take過拍晒:「唔單止我,好多現場啲工作人員都睇到眼濕濕,我好希望觀眾可以俾嗰份真打動到,因為有一個幸福嘅家庭,雙親都健在,或者成長期間有父母陪伴,都唔係必然嘅事。」但係有一件事王貽興一直好擔心,佢話:「詹Sir嘅造型係我細細個對爸爸印象,睇完呢場戲,對我嚟講有好大衝擊,勾起咗好多回憶,嗰陣瞓得唔好,仲好怕媽咪睇到古仔,俾佢斬死我!」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載