蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年04月24日

【蛇頭安排插隊】逾百長者群搶黃子華$880門票 凳仔阿婆:買一轉賺$100

149,778
建立時間 (HKT): 0424 11:45

黃子華最後一次棟篤笑15萬張門票,今早於城市售票網公開發售,不過網民抱怨無法登入,一度疑似死server,要早上10點54分先開始回復正常,唔止買唔到飛嘅網民鼓譟,喺售票處等緊入內買飛嘅市民都唔好受,現時出面落大雨,佢哋冒雨希望搶到飛,又要面對排隊黨。

相關新聞:【子華神門票公開發售】疑無限「加人」 頭位均疑似南亞排隊黨

今早9點幾,尖沙嘴文化中心門外已出現人龍,高峰期時更「打蛇餅」,當中逾百位長者在場排隊,為咗安全起見,現場職員進行派籌分流,9點40分才要求排隊人士返回原位,之後入內仍要分批等候,文化中心亦有保安及警察維持秩序,記者所見喺文化中心等買飛都係公公婆婆,10點正先正式開售,排頭位就係幾位阿叔,當記者欲訪問佢哋時,幾位阿叔表示不願上鏡,大罵現場記者「你哋唔去訪問林鄭月娥唔去做X」。

坐喺凳仔嘅張太接受訪問時,稱凌晨4點已經到場,佢話買飛係想同啲仔女睇,問到點解啲仔女唔嚟,張太話:「啲仔女要返工,冇打尖情況,後面(排隊嘅人)亦冇咩事。」見講廣東話、聲稱係香港人嘅張太,身邊有幾位大媽,張太解釋:「係我啲工友。」

相關新聞:【子華神‧公開發售】fans冒雨撲飛 頭位南亞裔Alfa順利買四張門票

曾婆婆帶高凳嚟排隊,問佢係唔係準備同仔女孫睇,曾婆婆話:「唔係呀!我幫朋友買,我年年都嚟。」

早上10點,文化中心頭位嘅人都順利買到飛,但佢哋唔願show飛,亦唔接受訪問即急步走,11點09分,拎住凳嘅婆婆向《蘋果》透露買一轉賺$100,佢哋買完一轉,又再排過隊買飛,展開「無限排隊戰」。

至於……點解子華神忽然咁受公公婆婆歡迎?!

排隊者Simon今日向《蘋果》提供咗一條影片,片中見一個身穿藍衫嘅人,疑似蛇頭,安排公公婆婆,又有啲操鄉音嘅大媽到場「打尖」,呢位藍衫嘅男子更指示啲婆婆去邊度坐,仲拎啲凳俾佢哋。此舉令本來排緊隊嘅人好嬲,片中聽到有一位女士質問:「我唔知你哋點樣嚟,亦唔知你哋為咗啲咩嘢錢,我哋係拒絕(呢啲行為),我哋排咗好多晚。」排隊者更提供蛇頭向在場老人及大媽派白信封,指示佢哋必須買最貴門票$880全掃,若果冇晒先考慮買$480、$380,紙上寫住7月8號,即係佢哋首要「任務」係買頭場。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載