蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月01日

【升呢演婆婆】與梁雍婷再演母女 53歲童顏寶珮如被嫌唔夠老

12,846
建立時間 (HKT): 0501 12:04

現年53歲嘅寶珮如同本月底便25歲嘅梁雍婷,去年喺電影《藍天白雲》結片緣,佢哋扮演兩母女,最後仲要畀囡囡殺死,悲劇收場。

寶珮如同梁雍婷戲外戲內都好夾,噚日再為港台劇《火速救兵IV》開工,咁啱佢哋再扮演兩母女,寶珮如今次仲升呢扮演外婆,佢有兩個女,大女係袁彌明,二女就係梁雍婷。

《蘋果》今日打畀寶珮如,問佢今次劇情是否仲係悲劇?佢笑笑口話:「今次唔使死,亦唔使畀個女打。」又稱:「呢次劇中,我演兩女之母,大女袁彌明已婚,有小朋友,二女梁雍婷話要做救護員,我反對,但囡囡係都要做,所以母女之間好多衝突,後期我見佢救人呢份工好有意義,最後都接納咗畀佢做。」

劇組噚日第一日開工時,覺得寶珮如外型唔夠老,所以特別安排佢化老妝,切合角色,佢話:「劇組嫌我皮膚太光滑,唔夠皺紋,所以要喺頭髮搽啲白色,又要戴副老花眼鏡。」寶珮如話劇情交代大女袁彌明嫁咗兼生埋小朋友,所以佢今次扮埋外婆。

寶珮如再喺戲中同梁雍婷扮兩母女,佢哋梗係好開心,寶珮如話:「我真係當佢女咁,講真我咁嘅年紀要生都生得出㗎,我同老公都好錫佢。」


精選娛聞,喺晒《娛果》 http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載