› 選擇地區
三藩市
紐約
洛杉磯
其他美國地區
香港 台灣 北美
 
2018年05月05日

【美魔女星媽!】羅霖三子加隻狗 一家五口齊齊入娛樂圈

建立時間 (HKT): 0505 16:27

羅霖2013年同富商劉坤銘離婚,兩個曾經為贍養費對簿公堂,前夫劉坤銘除咗喺學校同羅霖搶仔,甚至有指佢反索贍養費同分身家,搞咗一輪,羅霖唔想再煩,索性乜都唔要求,兩方先至可以達成協議庭外和解,而三個仔撫養權全部歸佢,但佢嘅擔子都幾重,因為要養起三個仔,認真唔容易。

要搵錢當然要復出,好彩有好多向佢伸出援手,所以羅霖一直唔缺工作,聽講最近佢三個囝囝都有意加入娛樂圈,大仔Nathan早排為韓國男團伴舞,二仔Jordan就想做藝人,咁樣就可以陪母親開工,不過二仔有次睇過羅霖現場拍一次戲之後,就放棄咗呢個念頭,因為等埋位要等好耐,同埋要記好多對白,而三仔阿晉就想做模特兒,如果佢啲仔仔真係成功入行,咁佢咪做正媽,到時調轉等仔仔佢哋嚟養佢。

最近羅霖接受周刊訪問,佢透露最近屋企多咗個新成員,就係4個月大嘅博美犬「Creamy」,佢已為一家人嘅新寵,而且佢仲係一隻招財狗。隻狗入咗屋之後就已經有人搵佢拍狗糧廣告,後來有人知羅霖養咗隻靚狗,又請佢同隻狗一齊拍寵物旅遊廣告,預計11月同隻狗一齊坐私人飛機去日本拍一日廣告,之後可以隨團去玩,公司仲肯請埋細仔阿晉一齊去,但到時要睇下個仔係咪有假放。

將來三個仔係咪入娛樂圈,羅霖話自己不會干涉太多,等佢哋讀飽書後,佢哋想做乜就等佢哋自己決定。不過依家為咗養大三個仔,佢要努力工作,感情事都唔急,佢同J君感情,佢都唔想發展得太快,最好慢慢嚟!因為佢對感情係好投入,當一段感情一出問題,佢成個人情緒會受到好大影響,為咗三個仔,感情事都要先放埋一邊。


精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載