› 選擇地區
三藩市
紐約
洛杉磯
其他美國地區
香港 台灣 北美
 
2018年05月09日

【捍衛繁體字】用粵語幫台灣政府拍宣傳片 蔣雅文:係我自己要求

建立時間 (HKT): 0509 23:00

曾經喺香港出道做歌手嘅蔣雅文,唔經唔覺已經移居台灣十年,十年當中,佢由一個少女歌手變為台灣人妻,喺台灣落地生根,開舖頭做生意。同樣地,喺呢十年當中香港亦都發生咗唔少嘅事,有好多大家預計唔到嘅改變,亦都有更多大家被逼嘅改變。

今日,蔣雅文喺fb分享咗一段佢為台灣政府拍攝嘅宣傳短片,並寫道:「能夠在臺灣使用我的『母語』-粵語,代言臺港交流的政府宣傳片,我想也是某種香港之光的榮譽吧,今天出席宣傳片的首播記者會,有記者問我說:『你認為在台灣擁有比較多選擇,是賺錢的機會嗎?還是…?』答案是相反,正因為放下了賺錢的念頭,才看到了其他選擇,然後,換來了生活。」

呢條短片係由蔣雅文自己講述嚟到台灣之後嘅感受,除咗全程都用粵語旁白之外,當中有唔少事都似乎暗合現今香港嘅情況,例如「你問我台灣有甚麼獨特的魅力?在這裡,大家可以更加暢所欲言,自由自在做自己」、「想突破傳統的創意可以更加大膽發揮」、「這裡離土地的距離也都更加接近」等等。蔣雅文仲提到,其實香港同台灣就好似老朋友一樣,只係我哋講粵語,佢哋講國語或臺語,大家都對繁體字有記憶同熟悉,同樣喺到努力捉緊同保護自己所認定嘅價值,想留低美麗嘅字型,想搵返過去嘅連結。

《蘋果》今日向蔣雅文問到呢條宣傳片段,對方以短訊回覆話:「拍攝嘅場地同畫面都係導演為我設計,係從我台北店同花蓮店延伸出去嘅題材,想講嘅嘢太多,片段內只能節錄,用粵語旁白係自己要求,始終係自己母語,大致上想表達香港人同台灣人所嚮往同追求嘅有唔少相似嘅地方,仲有無論身處何地,忠於自己先係最自在嘅事。」蔣雅文又話,咁做係想鼓勵大家攞勇氣出嚟做自己。

宣傳片連結: https://bit.ly/2FZFeJY

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載