蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月16日

【快過林憶蓮再婚】59歲李宗盛梅開三度 同細27歲老婆秘婚三年

120,128
最後更新: 0516 17:10 / 建立時間 (HKT): 0516 16:30

(新增回應)

台灣音樂教父、林憶蓮前夫李宗盛被爆梅開三度,今年7月「登陸」踏入60歲嘅佢,原來已經秘婚3年,老婆「千惠」細佢足足27歲。

李宗盛夫婦同友人遊船河相曝光,相中李宗盛同老婆並肩合照,33歲嘅千惠一頭長髮,零化妝樣子樸素,皮膚白淨,同李宗盛企埋一齊,兩人外表都算合襯。據知情人士透露,李宗盛私生活好低調,一直好少帶老婆出遊,不過,2015年曾經聽李宗盛介紹對方係太太,估計兩人秘婚3年,有指千惠婚後冇工作,平日主要照顧李宗盛媽咪,婆媳關係唔錯。

《蘋果》向有份同李宗盛夫婦遊船河嘅周華健了解,其經理人表示:「華健不方便回應,請諒解!」

對於被爆疑秘婚3年,台灣傳媒向李宗盛經理人求證,但對方冇聽電話,而同李宗盛老友鬼鬼嘅相信音樂執行長陳勇志、門諾醫院義工賈漢生都封口,齊齊表示唔清楚李宗盛嘅私人感情生活。

李宗盛嘅第一任老婆係前港台DJ朱衛茵,兩人於1987年結婚,育有兩女,其後李宗盛同林憶蓮合作擦出愛火花,背妻偷食爆婚外情,轟動中港台,結果1997年李宗盛同朱衛茵離婚,翌年娶林憶蓮為第二任老婆,兩人生下女兒李喜兒,但婚姻僅維持6年玩完,現時憶蓮同恭碩良拍拖,兩人頻傳婚訊,估唔到離婚後少有緋聞嘅李宗盛,反而快過憶蓮結婚。

而當日同遊船河仲有周華健、張清芳同老公宋學仁、黃品源同前妻蜜兒,似乎黃品源努力箍煲下,有機會前妻再續前緣。

喜事重重嘅李宗盛,喺今日公布嘅第29屆金曲獎入圍名單,憑《仍是異鄉人》角逐「最佳專輯製作人」,於記者會上由所屬公司相信音樂代表發言:「今天剛下飛機的李宗盛絲毫沒有因為這個消息(秘婚)影響到原來的生活步調,反而還精神奕奕的提醒大家:『不要因此打亂了我們今年排定的既定的計劃與未來那麼多想好好做的事。相信音樂謝謝大家的關心。』」


精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載