蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月17日

【型爆!】前無綫女星為佢息影生仔 張錦程教女:總之唔傷害別人咪算囉!

232,355
建立時間 (HKT): 0517 18:30

52歲嘅張錦程,係噚晚ViuTV播出一集《晚吹-Daddy Kingdom》嘉賓,佢接受兩位主持細So同陳詠謙訪問,大談女兒經,仲爆老婆張延,女兒3歲嗰時,已經問佢驚唔驚女兒同性戀。

入行多年嘅張錦程,參與拍過無數電影、電視劇演出,佢同同樣係演員嘅張延,95年一齊主持節目相識,到04年結婚,翌年就生咗個女,囡囡「張小小」都快將13歲。

張錦程話好多人覺得佢教女惡,佢承認如果女兒有原則性犯錯,一定會鬧。佢話:「例如主動欺負人,遲到呀咁,佢遲到我都會提下,好似話鬧鐘響咗要起身,如果佢唔起身,就自己遲到。」

主持問佢有冇試過失控鬧女?張錦程就話精準嚟講:我唔係惡,只係「非常嚴厲」。

張錦程話:「我會好嚴厲咁講件事,例如點解唔溫習?唔溫習所以就唔及格!」不過,張錦程話佢同女兒關係唔錯,仲話早前囡囡先教佢打機玩「食雞」。佢笑笑口話:「我由細到大對打機都冇興趣,又冇乜天份,佢(女)一路打一路救我,我就成日要問佢要唔要攞槍,要唔要跳出去,佢就會叫我『爸爸唔好行呀!』咁!」

張錦程話佢成日都同老婆講,個女長大後,會有自己嘅世界,總之,個女識得返嚟搵父母,咁就OK:「老婆喺個女3歲嗰時就問我,怕唔怕個女第日係女同性戀,我就問佢問嚟做乜,而且呢啲係生理影響,取向冇人知,佢(女兒)遲啲會知,但冇辦法。每人有每人想法,每人有每人喜好,總之唔傷害別人咪算囉!」

節目尾聲都會安排受訪嘉賓向子女講心底話,張錦程想講嘅就係:「爸爸好簡單,有嘢就做好佢,咁以後遺憾同後悔都會減少。」又提醒女兒,24小時點分配好緊要,除咗瞓覺,剩下時間點用,用得其所,就會覺得時間多咗,「無論你同朋友、屋企人相處,都會咁珍惜你嗰24小時!」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載