蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月24日

【全年冇嘢做】應屆港姐冠軍雷莊𠒇 宣佈返家鄉:嗰邊生活冇咁辛苦

562,554
建立時間 (HKT): 0524 20:00

新一屆港姐又嚟喇!今日無綫仲開始招募行動,請來陳凱琳、麥明詩、雷莊𠒇同劉穎鏇等人到尖東出席「2018香港小姐競選」記招,劉穎鏇仲獲大會送上蛋糕,慶祝21歲生日。

睇落去之前,停一停諗一諗,應屆港姐三甲,係邊三個?

冠軍係雷莊𠒇,仲拎埋最上鏡小姐,何依婷和黃瑋琦分獲亞軍同季軍。

零印象?好正常。因為佢哋除咗官方嘅工作之外,實際冇咩做。所以本來話改名唔再用「𠒇」字嘅雷莊𠒇,最後連名都唔改喇,做番自己。今日喺活動上仲宣佈,卸任後,佢會返加拿大老家。

早於日前雷莊𠒇同張寶欣出席大台另一活動時,已被傳媒追問未來動向,當時雷莊𠒇就話未講得住,要等到卸任時就會揭曉。雖然話唔講得,但雷莊𠒇都爆咗句:「我都想有忙碌嘅工作。」

今日港姐宣傳上,雷莊𠒇就話,卸任後想返加拿大:「選港姐嗰陣,講過想去荷李活發展,睇下有乜嘢機會,因為我覺得嗰邊需求中國演員,而且嗰邊生活冇咁辛苦。」換言之……

此外,雷莊𠒇晚上近八時,喺ig貼圖話:'In every ending, there is a new beginning. '跟住寫一大段客氣話,最後話:'No prize or title will be as valuable than the times we all laughed & cried together. Keepin’ it real till the end. '

雷莊𠒇去年9月當選時,都真係講過想喺呢行發展,仲話多倫多有間agency想佢合作,而佢嘅目標,係去荷李活發展。當時外間批評佢哨牙,五官不夠標緻,雷莊𠒇就話:「我咁遠嚟(即加國),對自己當然有信心,否則都唔會嚟參選,評判都係好專業,所以我唔會理會嗰啲。」至於箍牙,冇諗過。

當時報道得最多,除咗佢棚牙,仲有佢個「紅底爸爸」雷葆文。外間傳佢有過億身家,98年金融危機損手,近年積極參與大陸政府活動,政商界人脈甚廣云云。不過雷莊𠒇就話唔會理呢啲報道,家人亦未受影響。

雷莊𠒇任內另一項「戰績」,係代表香港當選《2018國際中華小姐》季軍。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載