› 選擇地區
三藩市
紐約
洛杉磯
其他美國地區
香港 台灣 北美
 
2018年05月25日

【歌詞夠本土】油尖旺金毛玲Serrini 住劏房的享樂主義

建立時間 (HKT): 0525 00:00

創作出《蘇菲亞的波霸奶茶》及《油尖旺金毛玲》等歌曲,深受年青一代喜歡嘅獨立音樂人Serrini,同時另一身份係香港大學研究生,曾修讀英國文學。曲風清新,歌詞「騎呢」大概係普遍人對Serrini音樂嘅評價,究竟Serrini平日嘅創作靈感係從何而來?日前《蘋果》就到港大訪問Serrini,又一齊落旺角街頭實地考察,睇吓感唔感受到箇中一二。

相關新聞:【街頭文化】受夠大媽群魔亂舞? 本土獨立音樂殺入旺角開騷

已經出到第四張專輯嘅Serrini話,由港大讀書期間開始寫歌:「首先喺學生宿舍宿寫,之後就自己畀錢自資出碟,再跟住周圍演出,舊年出咗隻碟叫《Don't Text Him》,我覺得係目前為止最得意嘅作品。」

雖然創作唔少貼地抵死嘅作品,但Serrini話自己其實好宅,好少特登出街搵靈感:「我好多時候都係留喺大學宿舍、圖書館或者Coffee Shop睇書發呆,而且我仲係住大學宿舍,所以基本上平時寫歌一日廿四小時都可以喺度,歌嘅主題貼地嘅原因我覺得從書本上知道越多嘢,反而有興趣一啲貼地嘅小故事,好多大敍述已經有人講晒啦,所以我想講啲小敍述融入我身邊發生嘅事。」

Serrini透露好多歌曲故事都來自朋友故事:「好似《油尖旺金毛玲》係講去唱『邪K』,我冇得親受感受,係我個男仔朋友去完唔知點解咁坦白肯話番畀我聽,於是首歌就用咗我朋友做主角,佢好正經但去咗唱『邪K』,其實隻碟仲有好多唔同嘅主題,我今次想講係抒發感情才是意義,因為深層感情嘅抒發對個人對城市都係一種治療 。」

除個人感情,Serrini話碟入面有《溝晒啲仔》、《Drink'n'dance》呢啲歌嚟形容時下嘅香港年輕人:「既然而家社會上年輕人覺得冇希望,社會亦都冇任何回應,於是年輕人決定咩都唔理,全心投入行享樂主義好似金毛玲嗰種,住喺劏房淨係關心今晚出街要著咩衫,專心做一個廢青,其實亦係對社會嘅控訴,雖然某程度係好無力,但另一方面講仍然有思想有能力去描述呢個行為係好強大。」

咁嚟緊Serrini會有咩搞作?佢話:「七月七號將會搞一個比較大型嘅Concert,我係好鍾意廣東話同唱廣東歌,最好唱到擴展去全球華人,好似一個旅遊大使咁,人哋聽到《油尖旺金毛玲》就好想去地鐵站影相,雖然喺香港做音樂搞創作好困難,但依然想堅持落去。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載