蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年05月28日

【爆相爆片】為照顧老伴離開無綫 資深藝人陳嘉儀:梗係陪我老公啦

489,766
建立時間 (HKT): 0528 00:01

現年71歲嘅資深女演員陳嘉儀,同郭鋒係無綫第一期藝員訓練班畢業,曾經拍過《山水有相逢》、《京華春夢》、《十月初五的月光》同《金枝慾孽》等受歡迎劇集,係好戲之人。不過,10年前嘉儀姐離開咗無綫,除咗舊年無綫播番10年前倉底貨《蘭花劫》之外,觀眾都未有機會再欣賞佢演出。原來,嘉儀姐因為要全心全意照顧患病嘅老公而放棄幕前演出,真係愛夫情切。

相關新聞:【高雅脫俗氣質】專演豪門闊太 陳嘉儀離開TVB享受退休生活

讀者陳先生透過《蘋果》「爆相爆片」報料,話早前上午11點幾,見到嘉儀姐同老公喺將軍澳PopCorn商場搭扶手電梯落地下,估計兩公婆剛剛食完嘢,嘉儀全程小心翼翼扶住老公出入。陳先生話:「佢全程蹺住老公隻手,兩公婆好恩愛,不過睇佢先生行動有啲緩慢,好似唔係好舒服咁。」陳先生話其實之前曾經喺將軍澳撞見過嘉儀姐,估計佢哋都係將軍澳區居住。

《蘋果》之前打俾嘉儀姐,佢話同老公喺將軍澳區住,所以撞見佢哋唔出奇。問佢當年點解離開無綫,以及會唔會再拍劇時,嘉儀姐就解釋原來係為咗照顧佢老公而離開無綫。佢話:「以前老公冇事就話拍吓劇,但呢幾年我老公有病經常出入醫院,我要照顧佢起居飲食,陪佢睇醫生、叫佢定時食藥,佢行路我都驚佢跌,要扶實佢。老實講,我哋一把年紀,仲有幾多年喺人世啫,我有時間梗係陪我老公照顧佢啦,仲拍乜鬼劇,梗係家庭梗要啲啦!再加上拍劇咁辛苦,夏天拍冬天戲咁,唔通我揀淨係秋天冬天先至拍劇咩?」

嘉儀姐話自己有兩個仔,其中一個已經結婚,仲生咗個孫仔,今年6歲,自己得閒佢都會同老公去睇吓孫仔,及做吓義工照顧老人家,生活相當充實。

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載