蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月02日
馬上成為壹會員

【失蹤人口】《望窗的季節》蔡濟文現身!黃翊感觸:同蔡仔斷咗聯絡廿年

建立時間 (HKT): 0602 00:00

多得《流行經典50年》,令好多90年代大家熟悉、而又退隱多時嘅歌手重現幕前,包括令人尖叫嘅蔡興麟、洪楗華、海俊傑、黃翊等等等等。今時今日再拎起支咪,唱功仍在。

相關新聞:【失蹤廿年…】98年蔡濟文轉行做燈飾 妙計奪陳珮珊芳心

當黃寶欣黃翊都「重出江湖」客串唱下歌、甚至受訪之際,有一個人,一直都冇現身。無論點樣邀請,都拒絕出山。

佢就係——《望窗的季節》蔡濟文。

48歲嘅蔡濟文,暱稱「蔡仔」,1988年參加香港亞洲電視舉辦的《未來偶像爭霸戰》,雖然落選,根據維基顯示,「其具爆炸力且感性唱功受部分音樂界人士認同」,89年入無綫拍劇,出過四隻碟,又轉投飛圖娛樂,同「飛圖鎮台之寶」梁雁翎合唱過《慢慢地陪著你走》……94年蔡濟文去咗亞視做藝員,4年後解約,轉戰大陸拍劇。至99年漸漸淡出,專心打理家族經營嘅燈飾公司生意,02年同前無綫藝人陳珮珊結婚。

近4年前,有傳媒影到蔡濟文陳珮珊同兩個仔入長洲嘅東灣海灘戲水,但關於佢嘅近況,就真係十幾年都冇Update。咁依家嘅「蔡仔」變成點呢?

日前蔡濟文同一班同期歌手——包括鄭敬基、杜德智同前女友李樂詩、何婉盈、胡渭康、黎明詩、唐韋琪、江希文、韋綺姍、蔡興麟、文佩玲、洪楗華、莫鎮賢、劉彩玉等等,去咗黃寶欣位於九龍城嘅港嘢茶檔「大團聚」——當然仲有黃寶欣。老土都要講一句:回憶返晒嚟!胡渭康仲話:「讓我們一夜回春!」

鄭敬基貼出兩張大合照,寫道:「The 80/90s class of music u guys are incredibly awesome! 難得1/4世紀重聚,呢班同期流行經典同學會嘅同學真係個個有心有力有正能,全晚笑到喊聲不絕之外,仲將遊戲獎金全數捐咗俾個慈善機構構我代收,真係……盡在不言中。期待715大家台上再見齊齊唱。」其中有個hashtag係「班長何婉盈」、「恩光成長中心」,原來佢哋會於當日喺中環海濱活動空間舉行《愛恩光經典金曲音樂會》。

黃翊接受《蘋果》電話訪問時話,因為大家都好耐冇見過,今次可以group埋廿幾個人,其中一個就係蔡濟文,所以就一定要同佢合照。黃翊仲話:「真係好耐冇見,起過廿年,所以就影幅相。我之前同蔡仔斷咗聯絡,係今次有機會見番佢,因為當年都算玩得埋,算係老友咁囉。」

02年蔡濟文同陳珮珊結束12年愛情長跑結婚時,體重一度升至200磅,比之前做歌手時發福咗一個碼。咁依家呢?變化唔大,個樣同以前差唔多,反而仲瘦咗,不過就有網民笑言個樣有啲似導演王晶。對此黃翊謂:「其實我覺得好多藝人離開咗呢個圈,各有各發展,幕前發展一定會保持靚靚,但離開咗一定可能都已經放鬆咗,可能同以前個樣唔同,亦都好正常,都已經廿幾年,有轉變都好正常,我都見有網民留言話蔡仔似邊個,咁都冇辦法,但蔡仔都好大方。大家咁多年冇見,咁貼相前都有徵求大家嘅同意,而大家喺噚晚都陸續貼相,所以我就貼咗同蔡仔嘅合照囉。」

黃寶欣就話兩、三年前見過蔡濟文:「其實我哋係喺之前《流行經典50年》嘅記者會上面見番,當時係食午飯,我哋坐嗰圍就好嘈,大家係咁抄晒牌(交換電話),何婉盈就負責開咗一個群組,我哋廿幾個就喺個群組日傾夜傾,好搞笑,每段日子都有約出嚟見面,好似之前劉偉恒嘅電影《某日某月》時,大家都有約埋一齊去睇戲,又會約下燒嘢食,搞啲聚會,今次嚟我間茶檔算係最多人一次。」

講多少少蔡濟文。其實佢同鄭伊健好有淵源,佢同鄭敬基、鄭伊健合唱《屬雞的男人》嘅《Home Alone》。2014年鄭敬基開演唱會,請來黃寶欣、鄭伊健任嘉賓,當時有話搵蔡濟文,但最後蔡濟文因有私人原因,未能現身。

蔡濟文同伊健另一個淵源,係有機會出碟。當年伊健獲蕭笙叔看中,搵佢擔任劇集《月兒彎彎照九州》男主角:「當年無綫用人好穩陣,但蕭笙支持用新人,唔係我冇機會做男主角,我可以出碟都係因為佢,係佢叫我返公司試鏡,陪蔡濟文去試鏡嘅唱片公司人員見到我就叫我去試音,我先有得出碟。」

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載