蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月03日

【曾拍《至尊計狀元才》】「西洋仔」簡達華腦癌病逝 終年61歲

137,758
建立時間 (HKT): 0603 16:31

曾經喺90年代,被稱「西洋仔」嘅演員簡達華,前日(6月1日)於東華醫院因腦癌病逝,終年61歲。當年佢經常同劉德華、譚詠麟等合作,專演奸角,演出過嘅電影有《至尊計狀元才》、《肝膽相照》、《江湖情》、《至尊無上》、《猛鬼學堂》等共十多部電影。

相關新聞:【演過黃秋生手下】常和劉德華合作 簡達華92年後再沒作品

今日聯絡到簡達華兒子,佢證實爸爸嘅死訊,佢接受本報電話訪問話,「爸爸大概三個月前發現患有腦癌,當時佢有啲唔舒服,入咗醫院先至check到個腦有事。呢三個月,痛苦就一定有,因為啲神經線壓住,而且佢漸漸冇晒啲記憶,只係記得三、四十年前嘅事。試過呢分鐘講嘅嘢,可能下一分鐘佢已經唔記得,到最後可能佢自己都唔知自己有乜病,其實咁都好,唔想佢咁辛苦,佢走得好安詳。」其子表示,由於父親於前日過生,要待明天辦公時間,才領到父親嘅死亡證。

喺父親節前夕,痛失爸爸,簡先生坦言好傷感︰「老竇係個好樂觀嘅人,好識得講笑,我哋兩仔爺都好鍾意車,成日一齊研究講吓車經,佢係一個好好嘅爹地。老竇演過嘅戲,我由細睇到大,當時佢同劉德華、曾志偉、譚詠麟合作過,佢啲角色都唔易做,因為要做奸,而老竇喺我心目中永遠都係hero。」

本身係澳門居民嘅簡達華,年幼時係孤兒,由養父養大,並跟養父姓簡。佢同現任太太結婚超過三十年,兩人育有一子一女。簡達華只拍咗十多部戲,之後轉行做生意,早年已經喺丹麥買下物業,兩名子女都喺丹麥讀書,算係生活無優。近年簡達華已退休,經常丹麥、澳門兩邊走,閒時又會返香港。

對於老公離逝,簡太接受電話訪問,佢形容簡達華係個好好先生,「佢係一個好爸爸,服侍得我好好,無微不致,佢唔想我辛苦,會做晒啲家務。我哋結婚卅幾年,真係好突然,我真係接受唔到。」

簡太忍住傷痛,談及和老公生活點滴,「佢嘅願係去外國生活,佢都做到。佢係個好識享受生活嘅人,要求有品味。可能佢細個係孤兒,所以對家庭好負責,好重視家庭。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載