蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月14日

【泰哥設靈】父親遺願睇世界盃 袁偉豪哭:可惜佢睇唔到我成家立室

125,764
最後更新: 0614 18:15 / 建立時間 (HKT): 0614 17:15

袁偉豪的爸爸泰哥上月16日因癌病病逝,享年67歲。袁偉豪在IG沉痛留言:「你是我心目中最堅強的爸爸,辛苦你了。不再痛苦,好好休息。」他又跟爸爸說:「放心,媽媽交給我吧。」最後寫上「0052,16-5-2018 #遲些見 #很掛念 #痛」(新聞連結:https://bit.ly/2It5LBb)

袁父今日紅磡世界殯儀館設靈,下午四時,袁偉豪與母親及女友張寶兒現身殯儀館打點。之後袁再下來,接受傳媒訪問。身穿白衣白褲黑鞋,架上眼鏡的他,神情肅穆。他說:「今日為爸爸設靈,聽日火化。今日啱啱喺公眾殮房認領爸爸,媽咪嘅心情都好反覆,認領嘅時候大家都忍唔住喊。」

袁父離世近一個月,袁偉豪表示:「中間都有啲喘息嘅時間,但嚟到呢度特別傷感,自己心情都好心酸,好心痛,但冇得抒發,一定要堅強,一定要面對。希望處理晒所有事,同工作之後,可以同屋企人放下假,散下心。」

「事發係好快……至今只係個幾月,其實當時爸爸都有講過,話好想睇埋世界盃。佢知道自己身體有問題之後,就好想睇埋世界盃,好想去迪士尼。但事發至今只係兩個月時間,所以佢一樣都未做到。」

「呢段時間,自己一個人靜落嚟嘅時候,都會諗番好多同爸爸一齊嘅往事。」

袁偉豪又說爸爸十分堅強,「佢真係一粒止痛藥都冇食過。當然,真正嘅痛楚只有爸爸先至知道,但由三月爸爸睇到報告開始,情況開始下滑,爸爸決定喺屋企,一個自己舒適嘅地方度過,我好尊重佢嘅決定。」

「爸爸對我應該都好放心…」此時袁偉豪已忍不住流淚,飲泣說:「可惜爸爸都係睇唔到我成家立室,喺有生之年,我會努力。」說畢就上樓陪伴母親。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載