蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年06月24日
馬上成為壹會員

【呢個人相當熟口面】臨時頂檔一演30年 ETV御用媽媽:唔係玩玩吓

建立時間 (HKT): 0624 00:00

又係一位睇樣一定認得,但好陌生嘅名字--許思敏。

無綫處境劇《愛‧回家之開心速遞》中飾演清潔女工群姐,早前一集講述群姐迷戀歐陽震華,與偶像保持應有距離感,明知Bobby已婚,但仍默默愛慕對方,最後同「大小姐」林淑敏抱頭痛哭一幕,唔少網民都讚群姐交出內心戲,抵讚!

群姐真名叫許思敏,入咗娛樂圈近30年,多年來都有幫港台拍攝教育電視(ETV),陪住好多80、90後成長。最近港台拍攝一輯《我們都是看ETV長大的》將於今日播出,講番呢位「ETV御用媽媽」當年點樣錯有錯著拍教育電視,思敏姐噚日接受《蘋果》電話訪問時話:「當時我係帶住兩個仔(大仔梁家池、二仔梁家偉)去港台拍ETV,咁啱有位媽媽演員甩底,咁PA(助理)問我『可唔可以頂上?』我話梗係得啦,都不知幾開心,當時仲同兩個仔做戲,但內容就唔係好記得。」

許思敏多年來都係飾演阿媽、三姑六婆、隔籬鄰居阿姨等角色,佢話一啲都唔介意:「冇所謂,自己都係師奶,做番自己冇壓力添,做戲乜角色都有,做師奶咪師奶囉。」

許思敏鍾意人嗌佢做思敏姐,連佢兩個仔都係咁叫,原來入行咁多年佢都一直係特約演員,佢話:「我都唔係好記得點入行喇,大概就係有朋友搵我拍廣告,群體戲玩下囉,嗰陣唔算臨時演員,應該係特約演員啩,薪酬高啲,一做就做咗咁多年。(有冇諗過簽做正式演員?)我覺得自己現在都係演員,都有諗過,但唔係成日諗。拍戲都叫做職業啦,因為有啲收入嘅,屋企又唔係旨意我養家,但我都唔係玩玩吓㗎,有劇本都會用心去做,盡量做到最好。」

思敏姐仲透露自己唱粵曲都好叻,可以唱晒平喉同子喉,間中都會出外登台搵銀。講到群姐一角被讚,思敏姐都好開心:「喺街都好多人認得,又同我影相,叫我群姐,角色被大家都認同都開心,唔會計較戲份多少,好人壞人都冇所謂,希望我做得越來越好,大家睇到都開心啲。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載