蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月04日

【過檔ViuTV】林曉峰首度主持戶外騷 Hailey好驚燈死比利時

11,717
建立時間 (HKT): 0704 11:32

上月底跟大台結束賓主關係嘅林曉峰(Lo),噚晚首度現身過檔加盟嘅ViuTV節目,阿Lo擔任ViuTV喺荃新天地舉行嘅戶外直播節目《Good Night Show全民睇波派對》嘉賓,跟一眾ViuTV主持陳炳銓(Danny)、強尼及陳俞希(Hailey)等合作,雖然第一日開工,見阿Lo跟一眾主持們都有默契,在鏡頭以外分別跟Danny、強尼及Hailey傾得相當融洽,在鏡頭前又盡現做慣大騷一眼關七嘅技巧,當一眾主持傾得興起忘記介紹下一個唱歌環節時,阿Lo就出手提議大家不如聽下歌先。

第一日開工感受,阿Lo指今次身份係嘉賓,主要嚟睇下新一輩主持喺主持節目時嘅方法,從中去學習,始終人係需要與時並進。至於ViuTV係咪會開新節目畀佢主持,阿Lo就話呢方面留待公司安排,嚟緊自己要忙電影宣傳,問到ViuTV有冇同佢傾談新節目有咩諗法意見時,佢就話:「如果佢哋問我咪傾吓,你同自己朋友有時都會傾到啲idea出嚟,何樂而不為呢﹗」係咪未正式傾?佢話:「我好多嘢都唔正式,我又唔係正式演員,又唔係一個正正式式主持,又唔係正式DJ,又唔係正式歌手,係咩都鍾意做嘅人。」至於今次跟ViuTV係合約演員定係純綷合作關係,佢話:「關於我工作同家庭嘅事,我都係交畀我經理人同我太太去理,我發覺男友少理呢啲事,生命會好長。」

有網民已經喺網上留言讚成佢過檔,仲話大台唔識貨,阿Lo話:「我好多時社交平台係有啲關心我嘅朋友,佢哋點comment又或者講乜,我通常唔多點理。」喺舊公司係咪覺得做到屈屈不歡?佢話:「我個人真係坐唔定,鍾意跳嚟跳去,如果坐得定,我打咗政府工,點解我鍾意做娛樂圈、做電影,就係好多變化,當我做慣一個地方,我又想跳去做啲新嘢。」對於新公司期望,佢覺得最重要係做好自己先,唔好理太多。

Hailey話睇稿先知道阿Lo加盟,本身好少機會喺主持工作上能夠同重份量主持合作,對於佢哋嚟講係新嘗試:「今次係一個學習好機會,事關阿Lo主持經驗豐富,希望之後仲有機會合作。」另外佢喺噚日零晨主持比利時對日本賽事中場休息時,着白Tee透出比利時國旗顏色Bra,Hailey話:「我有問一啲男仔意見,佢哋話支持球隊唔一定要着波衫,所以我哋就用咗個隱隱約約方法等大家去睇。」嚟緊每場免費直播球場中場時間,佢都會用呢個隱約方法去透露支持邊隊球隊,問到係咪已經準備好各隊球隊國家顏色嘅Bra?佢話:「有設計師朋友幫我準備,但我最驚係畀人話我係燈,因為我喺比利時對日本嗰場中場出現後,日本下半場就連入兩球,我就見到有網民話我燈死比利時,之後我放工返屋企,一知道比利時反超前,我即刻尖叫,因為好驚畀人話我係燈。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載