連開26場嘅黃子華最後一次棟篤笑《黃子華棟篤笑金盆o浪口》，今晚就喺紅館開鑼！頭場會講乜嘢金句無人知，只係噚日子華神就特別喺Facebook提醒觀眾，今次係十八禁內容，擺明兒童不宜只限香港。
子華今次為趕絕黃牛，一口氣開足26場，佢啲粉絲有望買到正價飛，而佢班老友就更要出力打氣，希望子華最後一次棟篤笑可以無憾咁去完成。
早年開騷失聲嘅Sammi，搵子華幫手做嘉賓，結果子華唔單止叫Sammi千祈咪回水，仲幫佢同安仔未來個BB改定名叫「許勝不許敗」，Sammi雖然支持子華收咪決定，但佢都話：「其實我係笑中帶淚，好唔捨得你封口、封咪、呀封乜都好啦，總知就好唔捨得！」
作為超級粉絲嘅超蓮就話會睇兩場，佢仲話：「子華神，係咪會除褲㗎？」而同子華合作舞台劇《前度》嘅法拉，就猛叫子華加油。
同子華一齊開過《鬚根Show》嘅吳鎮宇就搞笑話：「咁期待啷口之後，就刷牙，同金盆洗臉囉，開金盆啷口三部曲囉！」
林嘉欣就應該講出咗所有粉絲心聲：「希望你會反口，希望你唔好真係Last Talk Show，因為我覺得你係香港嘅聲音。」
《娛果》Facebook 專頁: http://fb.com/appledailyent
