巨星開騷，一定掀起撲飛潮，「子華神」黃子華今年初被爆會開棟篤笑《金盆o浪口》，未優先訂飛，大都四圍撲飛，當子華話呢次係最後一次棟篤笑，更係搞到一票難求局面。及至3月底，大會優先訂飛，唔單止網絡塞車，同時都有假訊息流傳。
子華一向好關注炒黃牛飛問題，同時呼籲政府解決黃牛問題。子華為咗杜絕呢個情況，佢喺優先訂飛時已聲明，佢話除正式賣飛會有加場，佢亦呼籲大家唔好買黃牛，佢寧見吉位都唔會益黃牛黨(新聞連結： https://bit.ly/2DYMZyy )。
子華今晚喺紅館首場騷，場外竟有人大膽兜售黃牛飛，喺入場位置有兩名操唔純正廣東話口音向現場觀眾兜售黃牛飛，佢哋冇拎拿飛、錢出嚟，只係問觀眾要吾要飛，現場紅館職員發現2人，即派出保安驅趕，理由係唔可以喺嗰個範圍兜售，所以連拎錢出嚟都唔得，但係佢哋都冇理會。
另一邊港鐵站則又有三名操唔純正廣東話嘅男士，向市民兜售黃牛飛，不過現場未有發現市民購買黃牛飛！
精選娛聞，喺晒《娛果》
http://fb.com/appledailyent
