蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月12日

【倒戈撐ViuTV?】現身世界盃節目惹合作揣測 曾志偉:總有機會

133,278
最後更新: 0712 18:03 / 建立時間 (HKT): 0712 00:25

【新增內容】

一講到曾志偉同電視,大家都會諗起大台,因為近年除咗大台,都唔會有機會喺其他香港電視台見到佢,不過今日世界變喇,因為喺ViuTv見到曾志偉!

今晚ViuTv嘅《Good Night Show 全民睇波派對》,曾志偉就現身做嘉賓,向來只會喺大台現身嘅志偉,今次倒戈出現喺ViuTv,唔知係咪同幾年前嘅恩怨有關呢?之後仲會唔會有機會喺ViuTv其他節目呢?

曾志偉一直都有同余詠珊傳不和,佢哋個嘅恩怨就由2013年開始,因為余詠珊統領下大改賽制,由做live變咗要錄影,志偉錄影時,亦按捺不住:「X你老味,港姐係live,點解要錄影呀?」但因為講嗰陣冇閂咪,結果人人都聽到,之後志偉連司儀都冇做。(新聞連結: https://bit.ly/2zADwR4 )

作為今晚節目嘅嘉賓,志偉同主持林曉峰都可以話係老拍檔,兩人難得喺ViuTV見面,緊係要傾返陣偈,問到志偉支持邊隊?志偉就先自抽話:「打和啦!」之後佢就解釋話英格蘭同克羅地亞兩隊咁鍾意射十二碼就射飽佢。

至於心水,志偉話因為佢最鍾意嘅巴西已經出咗局,唯有支持黑馬克羅地亞,身邊嘅主持潘杰寧細心發現志偉身上有英國國旗,志偉即刻話:「你見唔到我件衫咩色咩?黑住佢丫嘛。」


噚晚英格蘭同克羅地亞嘅世界盃賽事固然精采,不過點都唔及掌門人曾志偉倒戈出現ViuTV ,志偉現身嘅一刻,現場嘅觀眾忍唔住叫,唔知志偉同ViuTV係咪有進一步合作?志偉話: 「總有機會嘅! 」

雖然志偉同一班主持喺節目談笑風生,但係一向同志偉以父子相稱嘅阿Lo(林曉峰),就話自己好緊張:「我都係喺節目開始前先知道佢會出現,我諗喺鏡頭前都會見到我塊面立立令,我緊張到標晒汗!我仲俾佢搞到成part稿都唔記得咗,要搵位坐低背稿!」志偉亦都話:「最想唔到會喺呢度見面,仲一齊做世界盃, 好ok呀!」

聽日曾志偉仲會以明星足球名義,拉大隊前往俄羅斯欣賞世界盃本周日嘅終極大戰,成員包括羅家英、汪明荃、許志安、梁漢文、泰迪羅賓、吳國敬、劉浩龍、李子雄、張兆輝、馬海倫、羅鈞滿、衛志豪、伍偉樂,到時會合已經喺當地睇波嘅校長譚詠麟。

據知今次係ViuTV邀請明星足球隊一眾隊員前往俄羅斯,團員名單就係由明星足球隊決定, 就算有多係無綫藝員,但係ViuTV方面一概冇所謂!


精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載