蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月12日

【阿媽有微言】心穎洗腦結婚要獨立?馬明:暫時未有呢個話題

99,461
建立時間 (HKT): 0712 13:20

馬國明同黃心穎呢對戀人越來越公開,喺人前人後都攞正牌放閃,話晒拍拖咗都一段時間,大家都好自己咁關注佢哋嘅婚期,今日就有周刊道話,出咗名孝順嘅馬明,曾講過就算結咗婚都會同爸爸媽媽一齊住,點知自從同心穎拍拖之後,喺女友嘅洗腦之下,開始打消呢個念頭,要努力儲錢再買樓!

報道仲話馬明為咗女友,一洗佢嘅慳家本色,好似買衫買褲轉過啲形象,而且仲豪花20萬買咗對情侶戒,所以有傳馬媽媽喺呢方面有啲微言,不過話晒仔大仔世界,最緊要個仔鍾意。日前佢哋又俾人影到拍拖行又一城,都係一般情侶拍拖會做嘅事,即係行街睇戲兼食飯,不過馬明見到有記者影相,刻意將戴咗戒指嘅手插喺褲袋!

今日馬明接受傳媒訪問,佢話:「多謝大家關心呀,其實除咗真係要努力儲錢之外,全部嘢都唔係真,我哋暫時都未有結婚呢個話題,始終佢仲係好年輕,仲想喺事業上先衝刺一下,所以暫時未有呢個話題,呢個topic亦未喺個腦出現。」馬明仲話:「儲錢同其他嘢冇關,o依家香港嘅樓價又升得咁恐佈,咁辛苦搵啲錢返嚟,起碼唔好令佢貶值,最少都可以抗到個通漲,所以一定儲錢,再加上我哋呢行冇乜保障,可能出年啲觀眾又未必鍾意睇你,到時收入就少咗好多,所以咪要保障吓自己,如果到儲到錢,咪再去做吓啲穩陣嘅投資,為咗自己同屋企人將來嘅保障!」

至於心穎亦都話:「冇啲咁嘅事,多謝關心。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載