蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月12日

【《關你影視》Live】最愛《超人特工隊》落難英雄 郭子健寫出《打擂台》

6,008
建立時間 (HKT): 0712 21:00

《蘋果》娛樂全新節目《關你影視》,結合影評、電影資訊,同你開住Live講戲。啱啱播出嘅第二集,再次請來電影導演郭子健(Derek)同黄智亨(Henri)講《超人特工隊》(Incrediables)及對續集預測,仲有Pixar歷來最愛。

兩位嘉賓都係專業電影人,郭子健就曾執導《打擂台》,並同黄智亨聯合執導《全力扣殺》,兩位都得過香港電影金像獎。今次郭子健仲話《超人特工隊》令佢諗起《打擂台》:「我好鐘意啲suffer hero,嗰陣我部《打擂台》都唔多唔少有咁嘅感覺,唔係你嘅日子,又年華老去,我自己都好鍾意《Incrediables》,但其實唔想佢有續集。」好睇都唔想有續集?「第一集太完美,唔知第二集仲可以搞乜。」

雖然兩位都算係Pixer粉絲,但黄智亨都有套唔多鍾意:「最唔好睇就係《Cars》但又最快拍續集,因為啲車太好賣,但集集都麻麻地,我唯一一套睇Pixar瞓覺就係《Cars》。」呢個時候郭子健竟然話:「但係《Cars》有兩集嘅粵語版配音係我寫架喎!」黄智亨:「我就係睇粵語版囉。」大家即時大笑。

另外兩位都不約而同特別喜歡近作《玩轉極樂園》,因為鍾意佢「死」得有技巧,黄智亨:「套戲講咗細路仔問你,唔知點答嘅嘢。例如,爸爸你會唔會死?佢用好正面嘅方法講咗俾你聽咩叫做死。」而郭子健仲話套戲「行」得嚟又正:「《CoCo》有樣嘢好犀利,個世界一個鬼字都無提過,呢個亦係內地可以上畫嘅好大原因。你諗下佢首歌個melody行到癡線,但大樂必義丫嘛,佢個音樂一響就毛管都棟晒,呢套我覺得不得了。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載