蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月12日

【懷孕近8個月】鍾意落手落腳照顧家人 鍾嘉欣爆囝囝:好鍾意撩我搲我

105,431
建立時間 (HKT): 0712 19:38

鍾嘉欣15年嫁畀比佢年長13歲嘅脊醫老公Jeremy,翌年8月生咗囡囡Kelly,今年再有喜訊,上星期佢就喺社交網公佈咗今胎係囝囝,湊成一個「好」字,好多網民都戥佢高興(新聞連結: https://bit.ly/2NKeK4f )。懷孕近8個月嘅嘉欣BB,今日喺無預告下,突然喺fb開live,依然吸引到好網民睇直播,嘉欣BB即大讚粉絲叻叻豬!

嘉欣BB一開直播就話:「有一段時間冇同大家見面喇,今日我好忙呀,你見我化晒妝,整晒頭咁,因為去咗做一個珠寶活動,喺溫哥華,好開心呀,咁大個月陀住個B,扮下靚戴下珠寶。」之後就話:「大家好,我好好,我係咪依然都好纖瘦呀,其實都已經好快喇,就嚟八個月(身孕)喇,八個月呀身孕呀,時間過得好快,依家身體狀況還好嘅,OK嘅,只不過真係重咗好多,行路嘅時候「嘅吓嘅吓」,不竟時間過得好快,BB都好快出世。」

正在溫哥華養胎嘅嘉欣BB,有網民就話好掛住佢,嘉欣BB就話:「我都知道大家好掛住 我,其實我都好掛大家嘅,同埋我都有留意TVB嘅劇㗎,好似《深宮計》啦,仲有套《BB來了》,我超級鍾意睇呀!不過其實我都睇過一集咋,因為加拿大播咗一集咋,但係我就好支持老友黎諾懿啦,佳芯BB又演得好好啦,咁啱呢個時好多人都生BB,呢個題材又好啱。」

另外,亦有網民問佢有份主持嘅《再創世紀》幾時播?嘉欣就話佢都好想知,因為原先睇社交網,有粉絲就話會喺七月尾播,「但聽聞依家要延遲少少,所以唔知幾時播,我都期待,都好想睇。」講到肚裏面嘅Baby Boy,嘉欣就話:「佢喺我肚裏面呀,佢日日都郁呀,郁得好犀利呀!好鍾意撩我,搲我。」嘉欣BB再提到,目前懷孕進入第三個孕期係比較辛苦嘅,佢話:「(肚)開始墜,無論Kelly同呢胎都好,我都係陀得好低嘅,所以每日都會好重。」

嘉欣BB又話自己坐唔定,成日搵嘢做,喺屋企都坐唔定,「當你做咗Wife嘅時候,做咗個媽媽嘅時候,我又鍾意落手落腳,鍾意親手照顧Kelly,好想為屋企處理好多嘢,無論家頭細務,或者煮嘢食,我用呢個時間of my life去學點照顧人囉,以前好多人照顧,我幾幸福,依家有能力去照顧其他人嘅時間,我覺得我嘅幸福更加多咗囉!一個人有growing嘅時候,有progress嘅時候,係最幸福嘅時間囉,辛苦唔緊要㗎,最緊要自己有成長,每一日學多一個食譜,每一日學煮一個餸,或者學多啲同個女溝通,點樣同人相處,點樣做一個成年人,已經係好幸福嘅時間。」

直播尾聲,嘉欣BB話:「希望大家祝福我生產過程順利,能再次順產。作為媽媽,當然希望生產過程順順利利,不要太痛,快快趣趣見到健康的囝囝。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載