蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月13日

【港男2.0】福利圖!99男神PK賽爭做明星偶像

17,738
建立時間 (HKT): 0713 07:00
99個男人要唱歌、跳舞battle足兩個月,最後只有一個留低。

【特約報道】

世界盃向來係情侶關係大考驗,不過眨下眼已經踢到去冠軍戰,呢頭「體育」盛事即將閉幕,嗰頭另一場「睇肉」盛事已經緊接上場,講緊係ViuTV選秀節目《Good Night Show全民造星》,仲會連續兩個月為女生派福利,一於同男友請定假睇「哥」!

呢個世界真係「百貨撞百客」,有人鍾意高顏值嫩男,亦有人喜歡才華型暖男,呢99位入圍男神就樣樣齊,重點係人人有貨賣,好似45號綽號肥仔的安西教練梁業,單睇外型同「偶像」似乎爭成條彌敦道,但一跳舞就知咩叫高手在民間,唔怪得之前進行左首輪公眾投票,肥仔已經贏咗翻版彭于晏成為提早入圍50強之一。而演出過《狂舞派》的34號楊樂文就跳得睇得兼有幕前經驗;被封「嫩版陳偉霆」的76號鹿仔陸頌賢就係零死角花樣男靠眼神殺敵,仲有「100毛G-Dragon」、「嫩口林家棟」、「高大版杜汶澤」粒粒皆星,難怪成班女人睇到we嘩鬼叫。

不過,城城未遇到小美之前都做過路人甲,所以明星係要有伯樂「造」出來。 ViuTV就請咗卓韻芝、Eric Kwok、側田、劉美君、火火等10位評判兼任星級導師,佢哋已經揀晒蟀進行特訓,實行要地獄式訓練班男神唱歌、跳舞、主持、演戲瓣瓣掂。之前佢哋就試水溫展開首項拍主題曲MV任務,唱歌跳舞當然係基本功,大男人仲要學識「面皮厚」面對群眾,實行殺入銅鑼灣街頭玩快閃,聽聞當日有參賽者因為「爭位」而內訌,企前面的狗毛同阿餅仲俾大家藐爆,真係好睇過大台古裝後宮劇!而錄影時主持人心美BB又不留情面mean爆某位參賽者,究竟邊個咁慘慘豬?想知就要留意ViuTV於世界盃決賽前播出《Good Night Show全民造星》前傳同埋之後逢星期一至五每日播出一集的戲肉了。

《Good Night Show全民造星》
頻道:ViuTV99台
日期:7月15日晚上8時正(前傳)、7月16日起逢星期一至五晚上9時45分(首播)

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載