蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月15日

【相差5歲】鄧麗欣甜笑認拍拖 男友王子開腔保護姊弟戀

330,610
建立時間 (HKT): 0715 14:54

【新增回應】
34歲嘅鄧麗欣(Stephy)同游學修今日以蝴蝶大使身份,喺九龍公園出席「蝴蝶 x STEM博覽」,早前有指Stephy同前台灣偶像組合Lollipop成員、29歲嘅邱勝翊(王子)譜出姊弟戀,皆因早於4月時,有指佢哋一齊去泰國蘇梅島度假,雖然當事人否認戀情,但早前再被人目擊同一班機由香港到台灣,身邊無工作人員,因而再次傳出緋聞,豈料Stephy展露絲絲甜意,佢話:「其實感情方面,我想低調處理,因為過往嘅經驗,我認為感情係屬於兩個人,呢行好透明,變成感情都好透明,加上呢個年代,大家都有手機,低調係為咗保護感情,希望大家畀啲空間。」

相關新聞:【有着落?】舊愛Stephy晒姊弟戀 方力申睇波拍片有女入鏡

4月一齊旅行,當時係咪已經拍拖?Stephy甜笑指:「係囉,畀啲空間我哋去發展。」問佢同王子點樣遇上?佢話:「我哋識咗好多年,因為係同一間公司,不過以前唔熟。」咩位令佢哋熟?佢笑指係應采兒(丁丁)咁啱約大家食飯,佢笑言唔知丁丁算唔算叫做媒人。

講到今次係姊弟戀,Stephy話:「我冇諗太多,2018年喇,大家對所有嘢嘅接受能力都好高。」港台兩地,平時係咪以視像見面?佢表示希望大家畀啲空間佢。講到佢個樣好sweet,Stephy即刻話:「係好wet,因為落緊雨。」王子有冇恭喜佢攞獎?佢話:「有,但佢好忙,未有慶祝。」最後,記者向佢道賀,Stephy面紅紅笑住話:「多謝!突然好熱添!」

相關新聞:【舊愛拍拖了】Stephy sweet爆認戀王子 方力申IG掩面冇眼睇:別提了!

另外,王子今日亦都親自向台灣傳媒回應戀情話:「謝謝大家!也請大家給我們一些空間相處。」

講到Stephy早前憑電影《空手道》獲第17屆紐約亞洲電影節(New York Asian Film Festival)奪得亞洲新秀獎,佢好開心咁話:「好開心,第一次衝出亞洲,感覺好唔一樣,好緊張,因為係一個陌生嘅地方,第一個香港演員攞呢個獎,意義重大。」

提到杜汶澤笑問佢攞完獎未?Stephy話:「希望未,可以繼續攞,佢都開心,我哋有約食飯,但唔知邊個請呢,佢千叮萬囑叫我小心個獎,因為佢上次整爛咗個奬,其實呢個獎都好重,所以我都好小心拎返嚟,我好開心,當地都好鍾意呢部戲,佢哋評價係叫我有唔同嘅嘗試,希望我打入荷李活。」講到佢用英文致辭,佢表示在場人士都係外國人,要尊重大會,所以要準備充足。

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載