蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年07月26日

【兩隻都係白羊】卓韻芝「衝動派姊弟戀」入紙註冊 揭同居關係

134,826
建立時間 (HKT): 0726 20:45

真係峰迴路轉。

卓韻芝前年8月在棟篤笑騷上忽然宣佈出櫃有女友,但去年11月卻又爆出同猛男拍拖,今年初阿芝出新書《峰迴路轉》中宣佈婚訊,當時佢接受本報訪問時話:「自己寫書嘅,都希望用一本書嚟話畀大家聽開心消息,未正式結同落實結婚日期,但就有人求咗婚,有人應承咗。」之後更直認閃婚:「我識咗佢3個月,但第一日佢就求婚喇。」未婚夫仲親自整求婚戒指,以表誠意。(相關新聞: https://bit.ly/2o6QNrZ )

阿芝雖用「閃電俠」暱稱未婚夫,但佢好快被起底叫梁子賢,任職電影美術,佢哋婚期訂咗今年9月15日,喺中環外國記者會舉行,婚後阿芝繼續同88歲、相依為命嘅婆婆一齊住,早前婆婆見暈入院,康復出院,準女婿陪阿芝接佢出院,三人行好有愛(相關新聞: https://bit.ly/2AbXO3X )

距離婚期仲有一個多月,阿芝同未婚夫開始籌備,佢哋近日仲入紙登記結婚,根據申請書上顯示,梁子賢報稱做art director,現年34歲,細過阿芝5年,兩個都係3月生日,同係白羊座,姊弟戀開花結果,佢哋報住地址係天后興發街(即阿芝寓所),原來已係同居關係。

今日《蘋果》打畀準新娘阿芝,問佢婚禮搞成點?佢好風騷,甜到漏咁講:「幾好呀,因為得到各位朋友、前輩鼎力支持下,婚禮搞得非常順利,依家籌備兩部份,有一晚擺酒招呼親戚,另一日同我哋啲後生朋友cocktail reception。」阿芝話籌備過程好開心,笑言:「我應該冇揀錯未婚夫,因為大部份佢做,細節嘢佢同我安排好,算係開心去迎接婚禮。」

原來阿芝同未婚夫都同係白羊座,阿芝話:「白羊座係衝動派,一意孤行,對生命好有熱情,好有魄力,幾似佢,幾似我。希望將來有乜嘢事、大家唔同意見時,一個衝動,一個唔好衝動啦,唔好咁白羊。其他時候衝動好喇!」但其實兩個白羊座結婚,已經係衝動啦………佢都認:「我哋一齊結婚,都幾衝動喎,暫時相處之道學到呢個階段。」

婚禮阿芝話呢排籌備talk騷,所以未婚夫就趁空檔負責搞婚禮,「朋友都有幫手搞,搵頭紗,搞婚前派對,今次用一個婚禮,體驗到大家對我嘅關心同愛。」

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載