› 選擇地區
三藩市
紐約
洛杉磯
其他美國地區
香港 台灣 北美
 
2018年08月14日

【好有親切感啊】甘草演員大集合 演技爆發不輸視帝視后

一班老戲骨大鬥演技。
建立時間 (HKT): 0814 07:00

【特約報道】

入得娛樂圈個個都想紅,不過成班路人甲、清兵乙,最後跑出只有發哥同劉華一、兩個做主角,其他滄海遺珠就唯有繼續安份守己做好綠葉角色。好似陳國邦、張松枝、吳浣儀、魯文傑、劉錫賢、陳安瑩……個個實力超班,論演技肯定撼贏好多喜、怒、哀、樂都係一號表情嘅「視帝」、「視后」,偏偏就係爭個機會。好彩坎坷過後有艇搭,今次ViuTV新劇就搵黎一班綠葉搭新人擔正,仲要用埋「身後事」做題材,認真百無禁忌!

其實綠葉王又點只呢幾個名?不過肯堅持到今時今日就真係所剩無幾。好似大台御用二世祖張松枝,拍完《選戰》遇著港視不獲發牌,佢差啲就轉行去做紥鐵職安真漢子!而劉錫賢直情係亞視版ATV Buddy,由《吳耀漢攪攪震》、《我來自潮州》到《縱橫四海》都會見到佢,可惜亞視唔係永恆,肥仔賢都去咗演舞台劇。至於傻姑陳安瑩就更早「成名」,當神雕都進化到5.0,原來佢已經演出過百部電視劇,亦因為收入少而諗過轉行,再數仲有《閃電傳真機》隻jeep jeep鼠魯文傑、《五個小孩的校長》催淚嫻姨吳浣儀……

《身後事務所》故仔由《瑪嘉烈與大衛》監製南方舞廳負責,講述經營身後事務所嘅吳肇軒同6號@Rubber band負責為客人清理過身親友遺物,但過程中不斷遇到靈異事件,令佢地要幫忙解開死者嘅心結。故仔表面係以「死人」為題材,其實包含土地問題、小店被壓迫、網上欺凌等社會問題,係真‧香港人睇完肯定有共鳴。

話明係綠葉王大集合,所以場場戲都係演技大爆發。其中一場講述飾演的士司機嘅權叔劉錫賢因為拒載而令一個學生自殺,佢同老婆陳安瑩要面對輿論同社會壓力,一場文戲要演齊傷心、激動、絕望到崩潰嘅情緒轉變,層次多個俄國大師史坦尼斯拉夫斯基,真心要同「一個樣走天涯」嘅演員講句,戲,是要咁做的!

《身後事務所》
ViuTV 99台 逢星期一至五晚11時30分

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載