› 選擇地區
三藩市
紐約
洛杉磯
其他美國地區
香港 台灣 北美
 
2018年08月23日

【那些年秘密】于洋開跑車約薛家燕出遊 遭薛母棒打鴛鴦

建立時間 (HKT): 0823 00:00

68歲嘅薛家燕,8歲開始做童星,今年入行60周年,為慶祝呢個大日子,佢將於12月4、5號踩上紅館舉行一連兩場「薛家燕愛你無限60年演唱會」。家燕姐日前接受《蘋果》專訪,分享入行60年趣事。

相關新聞:【Captain Nancy嚟啦】薛家燕殺入MK 即場教街坊跳新版十字步

童星出身嘅家燕姐,當年一邊返學,一邊拍戲,當然要由穿梭片場課室講起,純撲校園出現童星,佢呢朵「校花」成為學校風頭躉,小息時會有好多同學去家燕姐課室外眼望望朝聖,估唔到其中一個會係于洋,佢哋同樣就讀旺角白布街聖公會諸聖中學。于洋雖然大過家燕姐1年,但于洋由大陸來港,所以讀低一班,係學弟。

家燕姐日前約埋于洋一齊返母校,校務人員安排咗老師及兩位學妹熱烈歡迎,家燕姐同于洋入教堂參觀,佢哋時光倒流那些年,一齊跪低祈禱。講到佢哋當年認識經過,家燕姐話:「我哋唔係同班同學,我留意到有個靚仔成日嚟裝我。」于洋話:「佢係童星,我哋一小息就走過去裝吓佢有冇返學,佢算係校花。當年點敢同佢講嘢,我哋0靚仔,點敢同佢交流。」

相關新聞:【結義54年】家燕姐入行全靠爺爺 馮素波最怕同公主妹妹出街

于洋同家燕姐中學期間一直未有機會真正認識對方,家燕姐中學畢業後全職拍戲,對演藝工作有興趣嘅于洋都受佢影響,投考邵氏,佢喺大陸學過芭蕾舞同體操,所以出道即有招牌動作「一字腿」。佢哋70年合作電影《石破天驚》,于洋當年先跟家燕姐相認,一齊開工拍戲,兩人好快熟絡。于洋對家燕姐好有feel,平日除咗做柴可夫管接送,有一次仲話要約佢去街。家燕姐話:「佢當年買咗架Alfa Romeo話接我去街,媽咪聽到我同佢去,媽咪又話跟埋去,點知落到樓下,佢揸跑車嚟,後面得dog seat,我媽咪即刻話咁唔好去,拉番我上樓,最終我哋冇得去街。」

趕絕外母型跑車,令家燕姐媽咪都「趕絕」咗于洋,于洋話:「佢爹哋媽咪好犀利。」家燕姐話原來雙親有見圈中人複雜,反對佢同行內人交往,家燕姐話:「估唔到于大哥係最單純,有次我去日本受訓,于大哥過來探我,佢拎個大篋,媽咪以為佢過嚟住好耐,打開篋,點知裏面放咗全部買畀我食嘅零食,當時我好感激,但媽咪唔鍾意。曾江約我睇戲,爸爸話佢使乜約我,問乜佢自己唔識去咩,黎小田都試過。」全部圈中男都被請食檸檬,後來于洋去咗加拿大發展,仲結埋結婚,佢哋各自組織咗家庭。

家燕姐95年離婚,其後復出拍無綫劇集《真情》扮「好姨」,劇情本交待佢同曾江一對,但曾江檔期唔夾要離開,劇情加入一個老公高山青,家燕姐向曾勵珍提議搵于洋,于洋形容高山青一角:「戇居佬。」家燕姐即答:「又啱佢做。」于洋於是由加拿大返港演出。「我人生呢60年,佢出現咗好多次。」家燕姐形容同于洋嘅緣份,當年因為家燕姐媽咪捧打鴛鴦,佢哋愛情止步,但最終卻喺《真情》內扮演夫妻。

家燕姐話當年因為爸爸做政府工,所以認識諸聖校長,佢由幼稚園直升到中學,佢好鍾意呢間學校,「當年一日幾組戲,冇乜勞工法例,童角都要拍天光,有時拍到5、6點,我返去換件校服又返學,有時我要拍外景就告假,但同學睇報紙見到有新聞,就知我詐病。」

採訪:比華利
攝影:郭賢興
攝錄:廖達燊
場地:正宗上海生煎皇


精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載