蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年08月25日
馬上成為壹會員

【另一種體會】拍《身後事》有深刻反思 6號:最緊要在生嘅人點去生活

攝影:沈健程、陳俊強
建立時間 (HKT): 0825 00:00

由南方舞廳監製嘅ViuTV劇集《身後事務所》目前熱播中,今次搵咗吳肇軒、繆浩昌(6號)、楊偲泳等一班新一代演員助陣,故事講述吳肇軒同6號開咗一間叫做「身後事務所」嘅公司,初初係諗住呢個行業易搵錢,主要係幫啲死咗嘅人處理未完成嘅心願,點知喺每個故事都佢哋有所體會。

相關新聞:【拍ViuTV劇得罪方丈】角色複雜夠吸引 陳國邦孖黃淑儀囝囝演同性愛侶

吳肇軒、6號同楊偲泳日前喺尖沙嘴接受《蘋果》訪問,顧名思義講到係身後事,對住一班正值壯年嘅演員嚟講,題材難免會有啲沉重,不過6號話:「其實成個故事鬼得嚟輕鬆,每一個故事都有唔同嘅啟發,係因為人放唔低,變咗離開嘅時候有心結,我同吳肇軒嘅角色去解開呢啲離世嘅人啲心結,再用呢啲身後事睇到好多o依家社會嘅嘢,變成反思。」

吳肇軒就話:「其實之前都會有啲避忌,不過我記得有一集同安瑩姐(陳安瑩)傾過,佢話其實唔使怕,事實上喺戲裡面,有好多係放低同解開心結,慢慢開始學識點樣去面對,喺生命上有好大得著,應該係放低影響生活嘅悲哀,接受唔到嘅情緒!」楊偲泳又話:「我哋都有討論過放低嘅問題,大家都好著緊係咪放低嗰個人定係嗰件事,o依家諗番係放低嗰個情意結,嗰一吓嘅傷心、唔捨得同埋悲哀,某程度上將放低乜嘢放大咗,但原來係唔需要刻意放低嗰個人,如果有啲在意嘅人離世,開心嘅嘢自己記得,唔需要一定話要忘記啲嘢,最緊要係放低一啲執著。」

人生在世,有好多嘢唔係必然嘅事,唔知佢哋又有冇諗過自己身後事?楊偲泳話:「都有諗過自己點樣處理,會諗吓其他人會點過,屋企人點算,希望在世嘅人對我嘅離開會有乜打算,始終我都走咗,但係都希望佢哋可以放低啲執著嘅事,當然唔好忘記我啦!」佢續話:「我最近都睇咗一套舞台劇,有一句說話都好深刻,啲人每一日都喺度如果如果,點知第二日行街就俾車撞死咗,我會諗我哋成日話將來要點點點,但係唔知下一秒係點,最理想梗係唔好俾自己後悔,但係同時都要珍惜眼前嘅嘢,呢樣先係最重要。」

吳肇軒反而話:「我又冇乜所謂,順其自然,冇plan任何嘢,有乜嘢想做咪做咗先。」6號話:「走係形式嘅嘢,最緊要都係在生嘅人點樣去生活。」

採訪:何慧斯
服裝提供: @ithk @journalstandard.jp(吳肇軒)
場地提供:香港郵意 Postcollectionhk、博勢力

精選娛聞,喺晒《娛果》
http://fb.com/appledailyent

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載