郭富城、楊千嬅、萬梓良（萬子）、鮑起靜、張達明等今日喺土瓜灣為新片《麥路人》進行開鏡拜神，萬子先後向城城同千嬅遞上利是，原來係畀城城嘅囡囡同千嬅嘅囝囝。
留有鬍鬚嘅城城，喺片中飾演金融才俊，佢話：「收到劇本，我同小美（經理人）講，呢個角色我一定要接，加上係香港電影，而且呢班演員都好有實力，我同千嬅都係第一次合作，同萬子合作過電視劇《成吉思汗》，當時我未畢業訓練班。」千嬅笑住話：「萬子好好戲，佢圍讀嘅時候，拍晒枱話『so what』。」
問千嬅同城城係飾演情侶？千嬅未有透露劇情：「複雜過，總之我哋係同是天涯淪落人，呢個故事係講無家者，有5個分線，我係其中一個，最貼地係呢幾年喺24小時快餐店都有無家者，其實佢哋都有佢哋故事，我聽過佢哋真實故事，做晒資料搜集。」之前被影過摷垃圾嘅戲份？城城話：「係嘅，呢部戲幾貼近寫實，我都有去旺角、深水埗、廟街、土瓜灣，平時好少去，再去有好大親切感。」
對於黎明喺社交平台貼張貼囡囡相，千嬅話：「好似佢呀！」城城指呢件係開心事，問佢哋覺得BB似邊個？千嬅話：「咁細個未知似邊個，好似我個仔，個個都話唔似我，但我覺得似我，我生得咁辛苦！」
萬子透露今次飾演好潦倒嘅無家者「等伯」，早前劇組安排佢去觀摩無家者，萬子慨嘆香港有呢個情況，覺得好悲涼。影相時，萬子同太太一齊合照，佢大讚太太對佢照顧有加：「呢半年，我嘅血糖同血脂都好高，醫生話唔再食藥，以後都拍唔到戲，腳行唔到，所以之前有人搵我，有動作戲，我都推咗，因為我冇信心完成呢個工作，呢半年，太太監督我食嘢，以前我係飯桶，0依家食少咗，夜晚食小米粥、粗糧，按時畀藥我食，所以我好慶幸拍到呢部戲，0依家血糖血脂指數低咗，望到邪惡食物，見到當食咗。」說完，萬子即刻錫太太一啖，多謝對方一直以嚟嘅照顧，難怪萬子比之前真係清減咗。
