蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月03日

【非一般港女】「打到流血最開心」ROCK唔係男仔嘅世界!

8,298
建立時間 (HKT): 0903 00:00

【非一般港女】好多人覺得夾Band只係男仔嘅玩意,但係有六位90後青春少女,用聲音話你知,Rock絕對唔係男仔嘅世界!

獨立樂隊FIESTER係香港少見嘅全女Band,6個女仔自中學起,每星期無間斷夾Band,感情深厚。咁多種音樂類型,點解偏偏揀感覺「粗魯」嘅搖滾樂?原來佢哋因為睇地下Indie Band騷而被搖滾吸引,就諗「點解女仔唔可以喺台上都咁型?」最後佢哋決定玩電子核音樂 (Electronicore),希望闖出一條血路。

台下嘅FIESTER都係斯斯文文,但係一上到台,拎起結他、鼓棍、咪高峰,響起第一粒音就即刻瘋狂跳起。主音Vicky表示,「上到台之後要同自己講,我要將音樂同歡樂帶俾觀眾,我唔可以怕羞,唔可以覺得驚。」Vicky仲練成獨特「咆哮」唱控,連結他手Coco都忍唔住大讚「正」。Rock嘅世界有個俗語叫「打交」,Sophia 解釋,「意思係同其他台下觀眾一齊推推撞撞。」結他手Coco笑言,初初學打交好「淆底」,「我淨係識怒啤人,而家我會衝到最前,人打我就打返人,其實女仔睇騷可以比男仔仲癲。」Coco希望欣賞佢哋表演嘅觀眾能夠盡情發洩,釋放壓力,「睇騷打到流哂血,咁我哋就最開心喇!」

FIESTER嘅自創歌曲《至死不渝》中有句歌詞,「衝破面前性別換來的注視,筋竭力疲過後成就動人的故事」就係佢哋嘅心聲,認為玩Rock不分男女,人人都可以參與。結他手Iris話女仔玩Rock唔係粗魯,係型,「啲人留意我哋係出於好奇,一班女仔玩搖滾,會同一班男仔有咩唔同?」結他手Coco覺得,「同男仔比,女生唔夠台風,因為無男仔跳得咁高。」Iris話都認同,話揈結他需要好大力氣,鼓手Sophia都話需要有手臂肌肉。FIESTER正正因為睇到自己嘅不足,更加努力練習,務求突破自己,所以每次揈完一首歌都會滿頭大汗。

追夢,並唔係人人都有嘅勇氣,但年紀小小嘅FIESTER一直堅持夾Band,即使差啲同死亡擦身而過。結他手Coco憶述四年前喺大角咀Band房遇上火災,導致嚴重燒傷。Vicky事發時第一個趕到現場,望住Band房着哂火,當時見唔到Coco踪影;就趕去醫院,Vicky話,「見到Coco第一眼我好心痛,佢對我真係好重要。」目前Coco仍未完全康復,但相當樂觀,「唔要屋企人、我隊Band擔心,出咗院第一件事就係夾Band,就算我得返三隻手指,我都會堅持呢樣嘢!」正因Coco對生命有份執著,令組合曲風改變,更創作了歌曲《殘酷●時光》,鼓勵人抓緊時間向前行。Sophia指人生好長,每個章節都有機會扭轉命運,有時候錯咗唔緊要,只要尚有呼吸,仍有機會重來。

好多人認為做音樂人會「乞食」,鼓手Sophia反問,「做咩唔乞食㗎?賣藝為生都不失為一個人生樂趣,而家仲有能力去做就盡做,珍惜,活在當下!」主音Vicky笑言,「甩哂牙,變咗老婆婆都要繼續玩!」結他手Iris接着說,「拎住拐杖,眼又朦,仍然要做一隊全女BAND!」帶住對搖滾嘅熱愛,對生命嘅執着,相信FIESTER嘅音樂夢,就如佢哋首《殘酷●時光》歌詞「不捨不棄,令快樂不會結束,夢想步伐繼續。」

鳴謝:Matt@DROPDmusic
記者:由由
攝影:峰 / DOM
編審:阿仙
編導:Jackal

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載