蘋果日報 | APPLE DAILY
› 選擇地區
三藩市
紐約
洛杉磯
其他美國地區
2018年09月06日

【547天的堅持】首個機場時裝騷 主腦陳柏熹「反轉」航空交通

40,844
建立時間 (HKT): 0906 00:00

本地時裝品牌Moiselle日前在機場世貿中心舉行「Stop The Air Traffic」時裝騷,吸引一眾名人明星包括佘詩曼、向華強夫婦、關心妍、周汶錡等捧場。這也是繼「Stop The Traffic」、「Stop The Sea Traffic」之後,另一高難度之作,由於時裝騷破天荒在機場附近舉行,很多瑣碎事情都要經機管局嚴格監管,難怪品牌創作總監陳柏熹(Harris)直言,這是「最冇話事權」的一個騷。

籌備這次時裝騷,單是申請場地,已花了近年半時間,但為貫徹品牌理念,也作為「Stop The Traffic」三部曲最終章,在機場舉行是勢在必行。經過跟機管局無數次溝通協調,終於趕及在時裝騷舉行前準備就緒,卻沒料到最大敵人原來是天氣。距離開騷還有兩小時,只見場地仍未ready,Harris強裝鎮定的說:「本身係前日開始set場,但係太大風大雨,我哋要鋪地毯,但係地毯膠又黐唔到,所以基本上都冇做過啲乜。」正所謂屋漏偏逢連夜雨,Harris在開騷前一晚接獲通知,原本嘉賓出場的一道門,突然變成防火緊急門,而另一道後備門又意外損毀,幾乎擾亂了Harris的全盤計劃。Harris笑說:「五點嘞就嚟,啲嘉賓六點半就會入嚟,我哋仲未做rehearsal。好快㗎啦,冇事,做到就得。」

對於Harris偏向虎山行的一份堅毅,Moiselle創辦人陳欽杰、徐巧嬌夫婦對兒子讚不絕口,陳欽杰說:「同我哋牌子一樣,意念有呢個突破性,我哋希望每個騷都係畀到VIP有個好深刻嘅印象。」徐巧嬌認為就算這次時裝騷需承受極高風險,仍然對兒子非常信任:「永遠都係向好嗰方面諗,而佢好多嘢都係自己一力承擔。我哋係佢上司,同埋係佢父母,係無條件全力支持。」

天公造美,活動開始一刻忽然停雨,令整個時裝騷得以圓滿。Harris事後說:「成日都睇住天氣報告,都唔準嘅。唯獨8點20分驟雨過咗,咁睇到下一舊雲係9點鐘,就唔理啦,鎖lift開騷。諗番起,都有驚無險㗎!」

採訪:倩宜、Sapna
攝錄:Neo、Dominic

娛聞樂陪你走遍全球追星,即Like「娛果」FB 專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載